Roytérs agéntliqi chet ellerdiki Uyghurlarning xitayning teshwiqatining eksiche a'ilisidikiler bilen hélihem alaqe qilalmaywatqanliqini bildürgen

Muxbirimiz irade
2021-09-23
Share

Roytérs agéntliqi 23-séntebir küni tarqatqan bir xewiride, xitay hökümitining teshwiqatlirining eksiche, chet ellerdiki Uyghurlarning öz yurtliridiki uruq-tughqanliridin xewer alalmaywatqanliqini bildürgen.

Maqalide bu yilning béshida béyjingda ötküzülgen axbarat élan qilish yighinida Uyghur aptonom rayonluq hökümetning bayanatchiliri gerche yurtliridiki tughqanliri bilen alaqishalmaywatqan chet ellerdiki Uyghurlargha yardem qilidighanliqini, ularning özliri turushluq döletlerdiki xitay elchixanliri bilen alaqe qilishi lazimliqini teshwiq qilghan bolsimu, biraq buning emeliyet emesliki misalliri bilen körsitip bérilgen.

Roytérs agéntliqi xitay hökümiti teripidin 20 yilliq qamaq jazasigha höküm qilin'ghanliqi melum bolghan doxtur gülshen abbasning qizi ziba murat we 15 yilliq qamaq jazasigha höküm qilin'ghan "Baghdash" torining qurghuchisi ekber esetning hedisi reyhan esetni ziyaret qilghan bolup, ularning her ikkisi özlirining amérikadiki xitay elchixanisi we Uyghur aptonom rayonluq hökümetke yéqinlirini sürüshtürüp qayta-qayta yazghan xetlirining jawabsiz qaldurulghanliqini bildürgen.

Ziba murat muxbirlargha hazirghiche özlirining apisi heqqide alghan birdin-bir resmiy xewirining xitay tashqiy ishlar ministirliqi 2020-yili béyjingda ötküzülgen axbarat élan qilish yighinida qilghan bir qur sözi yeni, gülshen abbasning "Térorluq jinayiti" we "Jem'iyet tertipini buzush" jinayiti bilen eyiblen'genliki heqqidiki sözi ikenlikini bildürgen.

Roytérs agéntliqining muxbirliri bu yil 5-ayda gülshen abbasning ürümchidiki turalghusini izdep barghan bolup, ular uning öyining ishikining qara xetler bilen pichetlen'genlikini körgen. Diqqet qozghaydighini shuki, bu péchet ürümchidin intayin uzaqtiki atush sheherlik saqchi idarisi teripidin sélin'ghan iken.

Reyhan esetning roytérs agéntliqigha éytishiche, uning inisimu aqsudiki türmige qamalghan bolup, uning a'ilisidikilerning ekberning aqsudiki türmige qamalghanliqini ispatlaydighan uchurgha érishishige 4 yil waqit ketken. Reyhan eset muxbirgha: "Biz bek ganggirap qalduq. U némishqa aqsuda bolidu?. . . Méningche, bu kishilerni yiltizidin qomurup tashlap, ularning rohini téximu qattiq buzushni meqset qilghan," dégen.

Ziba murat bolsa xitayning chet ellerdiki Uyghur guwahchilarni "Yalghanchi" gha chiqirish üchün bezilerning uruq-tughqanlirini ékran'gha chiqirip sözletkenlikini tilgha élip: "Gerche apamni undaq halette körüsh yürikimni aghritsimu, biraq héch bolmighanda uning hayatta ikenlikini bilgen bolattim," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet