Muhajirettiki Uyghurlarning uruq-tughqanliri köplep tutqun qilinmaqta

Muxbirimiz eziz
2018-10-02
Élxet
Pikir
Share
Print

Yéqindin buyan xitay hökümitining Uyghurlarni basturushigha munasiwetlik barghanséri köpligen guwahliq matériyalliri otturigha chiqmaqta.

Bolupmu muhajirette yashawatqan Uyghurlardin hazir özlirining biwasite yaki wasitilik uruq-tughqanlirining tutqun qilinishi heqqide ashkara guwahliq béridighanlarning köpiyishige egiship, xitay hökümitining Uyghurlarni milyonlap lagérlargha solawatqanliqi rast bolupla qalmastin, buning barghanséri éship bériwatqanliqi aydinglishishqa bashlidi.

"Amérika awazi" radi'osi 1-öktebirde élan qilghan rikar höseyin imzasidiki maqalida körsitilishiche, xitay hökümiti izchil milyonlighan Uyghurning lagérlarda qamiliwatqanliqi heqqidiki eyibleshlerni inkar qilip kelmekte iken. Shuning bilen bir waqitta özlirining"Islam qoralliqliri" we "Bölgünchilerge qarshi küresh qiliwatqanliqi"ni tekitlimekte iken. Halbuki aptor ziyaret qilghan muhajirettiki Uyghurlarning tutqun qilin'ghan uruq-tughqanliri birdek bu katégoriyege mensup kishiler emes iken.

Rikar höseyin ziyaret qilghan Uyghurlardin gülgine mamutning 16 yashqa kirgen oghli 2016-yili türkiyedin tughqan yoqlash üchün qaytip ürümchi ayrodromigha chüshüshige qolgha élin'ghan. U bu heqte söz qilip :" Oghlum döletni aghdurushqa urun'ghan, dep eyiblinip 13 yilliq qamaqqa höküm qilindi" dégen. Amine muhemmedjan isimlik yene bir Uyghur ayal bu heqte guwahliq bérip, qizi göher nijat türkiyege barmaqchi bolup yolgha chiqqanda ürümchide saqchilarning uni tutqun qilghanliqini, hazir qizining qolgha élin'ghanliqidin bashqa héchqandaq ehwaldin xewersiz ikenlikini bildürgen.

Maqalida körsitilishiche, héchnémidin -héchnéme yoqla uruq-tughqanliridin mushu yosunda juda bolghan Uyghurlar san-sanaqsiz bolup, muhajirettiki bu Uyghurlar héchqandaq jinayet sadir qilmighan tughqanliri bilen normal téléfon alaqisida bolushqimu qadir emes iken. Chünki chet'eldin kirgen herqandaq téléfonning herqandaq Uyghurni tutqun'gha aylandurup qoyush éhtimalliqi bar iken. Gerche xitay hökümiti özlirining "Musteqil sherqiy türkistan döliti qurmaqchi boluwatqan bölgünchilerge qarshi küresh qiliwatqanliqi"ni tekitlep kéliwatqan bolsimu, Uyghurlar milyonlighan xitay köchmenlirining bu rayon'gha köchürülüp, Uyghurlarning nopus qurulmisini özgertmekchi boluwatqanliqini eyiblimekte iken.

Toluq bet