Xitay da'iriliri Uyghur élide tijaretchilerning dukan aldigha sémont qozuq orunlashturushini telep qilghan

Muxbirimiz erkin
2018-12-24
Élxet
Pikir
Share
Print

Xitay da'irilirining Uyghur aptonom rayonidiki muqimliq siyasiti hökümetning puqralargha "Külkilik" we "Yolsiz" teleplerni qoyushigha seweb bolmaqta iken.

Da'iriler Uyghur élining bezi rayonlirida tijaretchilerning dukini aldigha qatarisigha sémont qozuq ornitishini telep qilghan we herqandaq kishining yanfonini taqap qoyushni chekligen. Italiyediki "Zimistan" torining 23‏-noyabir ashkarilishiche, dukini aldigha sémont qozuq orunlashturmighan we téléfonini 24 sa'et ochuq qoymighan dukandarlargha jerimane qoyulidiken. Eger yene xilapliq qilghanlar bolsa yighiwélish lagérigha yollinidiken.

Xewerde, Uyghur aptonom rayonining sawen nahiyeside her bir dukan aldigha qatarisigha bir yérim métirliq sémont qozuq ornitilip, qozuqning 70 santimétir qismining yer astida, 80 santimétir qismining yer üstige chiqip turushi, yer üstige chiqip turghan qismining qara we sériq rengde sirlinishi telep qilin'ghanliqini bildürgen.

Xewerde bayan qilinishiche, buninggha emel qilmighan dukandarlar jazalinidiken. Xewerde yene buninggha emel qilmighan dukandarlargha jerimane qoyulup agahlandurulidighanliqi, eger yene dawamliq emel qilmisa "Qayta terbiyelesh" namidiki yighiwélish lagérlirigha yollinidighanliqini bildürgen.

Melum bolushiche, her bir tal qozuqqa 360 som xelq puli kétidiken. Bu dukandarlarning naraziliqini qozghighachqa da'iriler yéqinda qozuqning bahasini bir az chüshürüp bergen. "Zimistan" torining xewiride yene da'irilerning qumulda dukandarlargha buyruq chüshürüp, "Junggo téléfon" shirkitining yanfoni we sim kartini ishlitishini telep qilghanliqini bildürgen. Xewerde ashkarilishiche, buyruq boyiche dukandarlar yanfonini 24 sa'et ochuq tutushi, saqchilar chaqirghan haman derhal yétip kélishi kérek iken. Saqchilar chaqirghan haman yétip kelmigen dukandar derhal qolgha élinidiken. Xewerde yene bezi yézilarda yanfonini taqap qoyghan puqralarning ma'ashi yaki pénsiye puli tutup qélinidighanliqi shundaqla ularning qolgha élinish éhtimalliqi barliqini bildürgen.

"Zimistan" torining ilgiri sürüshiche, xitay da'irilirining bu xil yuqiri bésimliq siyasiti rayonda nurghun dukanlarning taqilishini keltürüp chiqirip, ushshaq tijaretke qattiq tesir qilghan.

Toluq bet