Нюйорк вақти гезити “уйғур елидики хәвәр қилинмиған қанлиқ вәқәләр” темисида хәвәр елан қилди

Уйғур елида йеқинқи икки һәптә ичидә арқа - арқилап 3 чоң вәқә йүз берип, нурғун киши өлгән болсиму, хитай һөкүмәт даирилири вә униң хәвәр агентлиқлириниң һечқайсиси бу вәқәләрни елан қилмиған. Бирақ, истансимиз мухбирлириниң вәқә йүз бәргән бай наһийииси вә қағилиқ наһийисигә телефон қилип ениқлашлири нәтиҗисидә вәқәләрниң тәпсилатлири дәлилләнгән иди.

13 - Феврал күни гумида бир пидаий өзигә партлатқуч бағлап, 8 сақчини партлитип өлтүргән. Аридин үч күн өткәндин кейин дада - бала икки киши билән сақчилар арисида тоқунуш чиқип 3 киши һаятидин айрилған. Бир күндин кейин йәни 17 - феврал күнидә бай наһийисиниң яқаериқ базирида тоқунуш чиқип, 17 киши өлгән иди.

Бүгүн, нюйорк вақти бу һәқтә хәвәр елан қилип, уйғур елида йүз бериватқан нурғун мушундақ зор вәқәләрниң җим - җитла беселип кетиватқанлиқини билдүрди. Хәвәрдә мундақ дейилгән : “юқиридики вәқәләрниң бири әгәр америкида яки яврупада йүз бәргән болсиди, ахбарат вастилири һәптиләрчә тохтимай бу вәқәни хәвәр қилған, мәмликәт бойичә немә үчүн вә қандақ болуп мушундақ бир вәқә чиққанлиқи һәққидә айларчә муназирә қозғилип кәткән болатти. Һәтта бу вәқәләр ирақ, пакистан, сүрийиләрдә йүз бәргән болсиму, әпсуслинарлиқ хәвәр сүпитидә тилға елинған болатти. Бирақ, хитай һөкүмити контроллуқидики хәвәр органлири бундақ вәқәләрниң йүз бәргәнликиниму етирап қилмайватиду.

Нюйорк вақти гезити хәвиридә юқирида йүз бәргән вәқәләрниң һәммисиниң әркин асия радиоси тәрипидин дәлилләнгәнликини, өзлириниңму бәзи әһвалларни игиләп дәлиллигәнликини әскәрткән. Улар шундақла әмәлийәттә, йүз бериватқан вәқәләрниң буниңдинму көп болуши мумкинликини, бирақ хитай һөкүмити учурни қаттиқ контрол астиға еливалғанлиқтин бу вәқәләрдин хәвәрдар болуш имкансиз икәнликини баян қилған.