Уйғур диярида 90% тин көпрәк уйғур һөкүмәт хизмитигә қобул қилиништа сиясий тәкшүрүштин өтәлмәйдикән

Мухбиримиз әркин
2020-05-11
Елхәт
Пикир
Share
Принт

Италийәдики «зимистан» намлиқ тор журнили хәвәр берип, уйғур диярида 90% тин көпрәк уйғурниң һөкүмәт хизмитигә қобул қилиништа сиясий өткәлдин өтәлмәйдиғанлиқини билдүргән.

Мәзкур тор журнили бу учурни өзиниң 9-май күни елан қилған «шинҗаң районидики сақчилар: тәкшүрүш понкитлири, лагерлар вә вәһимә» намлиқ хәвиридә ашкарилиған. Хәвәрдә көрситилишичә, бу учурни хитай өлкилиридин келип «шимали шинҗаң» да ярдәмчи сақчи болуп ишләватқан бир хитай сақчи тәминлигән.

У нөвәттә 100 миңдин артуқ қанун иҗра қилғучи хадимниң үрүмчигә орунлашқанлиқини билдүрүп, мундақ дегән: «шинҗаңниң һәр қайси җайлирида җамаәт хәвпсизлик органлиридики бош қалған нурғун орунларға давамлиқ адәм қобул қилиниватиду. Чүнки уйғурларниң 90% тин көпрәки һөкүмәт хизмитигә қобул қилиништа сиясий тәкшүрүштин өтәлмәйду. Шуңа даириләр хитайниң башқа җайлиридин нурғун сақчи қобул қилип, шинҗаңда ‹бихәтәрликни қоғдаш' қа әвәтиватиду.» Униң ашкарилишичә, райондики һәр бир сақчида бир «әқлий иқтидарлиқ сақчи янфони» болидикән.

Улар һөкүмәтниң санлиқ учур амбириға кирип, райондики һәр қандақ кишиниң шәхсий учурини тәкшүрәләйдикән. Бу сақчи хадими сақчиларниң кочида кетиватқан һәрқандақ кишини һәр қандақ вақитта сорақ қилалайдиғанлиқи вә тәкшүрәләйдиғанлиқини билдүрүп: «мән бир уйғурниң бир күндә 34 қетим тохтитилғанлиқини билимән,» дегән.

Уйғур кишилик һоқуқ қурулушиниң билдүрүшичә, хитайниң 2017-йили башланған чоң тутқунида нурғун уйғурлар һакимийәт системисидин йирақлаштурулған. Улар я тазилап чиқирилған яки лагерларға қамалған вә яки кесиветилгән.

Пикирләр (0)
Share
Толуқ бәт