Қарақашниң маңлай йезиси оқутқучиларниң яғлиқ чигишини мәни қилған

Хотән қарақаш наһийисиниң маңлай йезилиқ парткоми 17‏- сентәбир күни маңлай оттура мәктипигә йиғин ечип, 18 ‏-сентәбирдин башлап уйғур аял оқутқучиларниң яғлиқ чигиши мәни қилинидиғанлиқини уқтурған.

Мәзкур қарар уйғур елидә йәрлик даириләрниң диний етиқад вә диний етиқадни гәвдиләндүридиған символлуқ нәрсиләрни чәкләш йолидики йәнә бир йеңи қарари.

Кишилик һоқуқ тәшкилатлири илгири хитай даирилириниң сақал, чүмбәл, пәрәнҗә қатарлиқ қияпәтләрни чәклишини тәнқидләп, пуқраларниң күндилик турмушиға арилишиши техиму зор қаршилиқларни кәлтүрүп чиқиридиғанлиқини агаһландурған иди.

Бирақ қарақашниң маңлай йезиси бу агаһландурушни нәзәргә алмиған. “уйғур биз” ториниң ашкарилишичә, йезилиқ партком 17‏- сентәбир ачқан йиғинида йәнә оқутқучиларни агаһландуруп, әгәр аял оқутқучилар яғлиқ артип мәктәпкә кәлсә қаттиқ тәкшүрүлидиғанлиқи вә хизмитидин тохтитилидиғанлиқини билдүргән.

Маңлай йезиси вә у қарашлиқ қарақаш наһийиси уйғурлар әң мәркәзлик олтурақлашқан, аһалиләрниң диний етиқади күчлүк җайларниң бири. “ уйғурбиз” ториниң билдүрүшичә мәзкур наһийидики 531 миңдин артуқ нопусниң 97% тин көпрәкини уйғурлар тәшкил қилған.