Amérikadiki Uyghur yashliri amérika kéngesh palata re'isi méch makkonélgha chaqiriq qildi

Muxbirimiz irade
2019-12-11
Élxet
Pikir
Share
Print

Amérika awam palatasida 3-dékabir küni 1 ge qarshi 407 awaz bilen maqullan'ghan "2019-Yilliq Uyghur kishilik hoquq layihesi" ni bu yil ayaghlashmay turup kéngesh palatasidin ötküzüsh üchün amérikadiki Uyghur jama'iti pa'al heriketke keldi.

11-Dékabir küni amérikadiki bir qisim Uyghur yashliri amérika kéngesh palatasining re'isi méch makkonélgha xitab qilin'ghan bir qisqa widiyo teyyarlap tarqatti. Bu Uyghur yashliri widiyoda özlirining amérika puqrasi ikenlikini tekitligen. Ular widiyoda "Xitay hökümiti bizning ata-ana, tagha-hamma we bashqa uruq-tughqanlirimizni lagérgha qamash, görüge élish qatarliq usullar arqiliq amérika puqralirining herikitini amérika zéminida turup kontrol qilishqa, chekleshke urunuwatidu," dégen.

Ular Uyghur élidiki lagérlarda milyonlarche kishining azab chékiwatqanliqini eskertip, amérika kéngesh palata re'isi méch makkonélni awam palatada tarixiy xaraktérlik yuqiri awaz bilen maqullan'ghan bu layiheni derhal kéngesh palatada awazgha qoyup uning bu yil örülmey turup qanun'gha aylinishigha kapaletlik qilishigha dewet qilghan.

Amérika Uyghur birleshmisi 8‏-dékabir küni yighin chaqirip, "Uyghur kishilik hoquq qanun layihesi" ning tézrek maqullinishi üchün amérikadiki barliq Uyghurlarni omumyüzlük seperwerlikke chaqirghan idi. Yuqiriqi bu widiyomu amérika Uyghur birleshmisining orunlashturushi bilen ishlen'gen bolup, u nöwette ijtima'iy taratqularda keng tarqitilmaqta.

Melum bolushiche, qanun layihesining kéngesh palatasida mushu ay ichide awazgha qoyulushini qolgha keltürüsh üchün amérikadiki her bir Uyghurning kéngesh palata rehbiri mich mikkonélgha we bashqa kéngesh palata ezalirigha téléfon qilishi, xet yézishi, yüz turane körüshüshi, shuningdek amérika jem'iyitige xizmet ishlep, tetqiqatchilar, ammiwi teshkilatlar, taratqular we qolum-qoshnilarni seperwerlikke keltürüshi zörür iken.

Toluq bet