Xitay da'iriliri Uyghur élining yéza-qishlaqlirida réwiziye ishxanilirini omumlashturmaqta

Muxbirimiz sada
2018-12-24
Élxet
Pikir
Share
Print

Xitayning yéqindin buyanqi Uyghur diyaridiki Uyghur qatarliq milletlerge yürgüzüwatqan teqiblesh siyasitining dawamlishishigha egiship, rayondiki herqaysi yéza-bazarlarda intizam tekshürüsh komitéti orunlashturghan réwiziye ishxaniliri keng omumlishishqa bashlighan.

"Shinjang géziti" ning 24-dékabir küni élan qilghan xewiridin qarighanda, 19-dékabir küni Uyghur aptonom rayonluq intizam tekshürüsh komitétining nahiye-bazardiki nazaret ishxanisi sanji shehirining da shichü bazirida yighin échip, shu jaydiki yéngidin échilghan 16 réwiziye ishxanisining échilish murasimini tebrikligen. Mezkur bazardiki réwiziye ishxanisining bir kadiri ipade bildürüp: "Bundaq ishxanilarning qurulushi yéza-bazar kadirlirini artuq bir jüp 'nazaret közi' bilen teminlidi, bu bizning buningdin kéyinki ish-heriket we gep-sözlirimizni qéliplashturushimizda muhim rol oynaydu," dégen.

Xewerdin melum bolushiche, Uyghur diyaridiki nazaret obyékti bir milyon 160 ming adem bolup, buning ichide nahiye-bazar we kenttiki ikki derijilik nazaret obyékti 533 ming ademge yétidiken. Xewerde déyilishiche, kent, yéza-bazarlardiki réwiziye ishxaniliri Uyghur aptonom rayonluq nazaret-intizam tekshürüsh komitétining bu yil kirgendin buyan kadirlarning nazaret qilish iqtidarini asasiy qatlamghiche kéngeytish herikitining netijisi iken.

Xewerde qeyt qilinishiche, yene atush shehiri azaq yézisidiki réwiziye ishxanisining bir xitay mudiri "Döletning nazaret sistémisi islah qilin'ghandin kéyin, azaq yézisidiki nazaret obyéktining sani 760 ademge yetkenliki, özlirining "Xatirjem bolghanliqi" ni bildürgen. Uyghur aptonom rayonluq nazaret-intizam tekshürüsh komitétigha mes'ul bir xadim bu xil réwiziye ishxanilirining qurulushi xelqni "Yéqin ariliqta nazaret qilip, bir qolda bölgünchilikke, bir qolda chiriklikke qarshi küreshte ching turush" ikenlikini alahide eskertken.

Xitay da'irilirining yézilarghiche réwiziye ishxanilirini omumlashturush herikiti kishilik hoquq teshkilatlirining xitayning Uyghur diyarida keng kölemlik nazaret tüzümi ornatqanliqi, milyondin artuq Uyghur we bashqa musulman milletlerni lagérlargha solap, nazaret astigha alghanliqini tenqid qiliwatqan weziyetke toghra keldi. Bu yil 26-séntebir küni amérika dölet mejliside échilghan Uyghur diyaridiki lagérlar mesilisi heqqide guwahliq bérish yighinida, gérmaniyelik mutexessis adri'an zénz Uyghur diyaridiki yuqiri derijilik nazaret sistémisini tilgha élip, rayonning alliqachan bir "Saqchi döliti" ge aylan'ghanliqini tekitlep ötken idi.

Muhajirettiki Uyghur közetküchilerning bildürüshiche, xitayning rayonda bu xil réwiziye ishxanilirini qurushi buningdin burun qollinip kelgen nazaret sistémisini yene bir derije mukemmelleshtürgenlikining roshen ipadisi iken.

Toluq bet