Amérikidiki 6 neper sénator pompyogha xet yézip Uyghur zhurnalistlarni qoghdashni telep qildi

Muxbirimiz qutlan
2018-07-30
Élxet
Pikir
Share
Print

26-Iyul küni amérikidiki tesiri zor 6 neper sénator amérika dölet ishliri ministiri mayk pompyogha imzaliq mektup yollap, erkin asiya radi'osida xizmet qiliwatqan Uyghur zhurnalistlarni qoghdashni we ularning xitayda tutqun qilin'ghan ata-ana, uruq-tughqanlirining ehwalini jiddiy sürüshtürüshni telep qildi.

Sénator mark warnér bashchiliqida yézilip 6 neper sénator imza qoyghan we amérika dölet ishliri ministiri mayk pompyogha tapshurulghan mezkur mektup del ötken hepte washin'gtonda échilghan "Diniy erkinlikni ilgiri sürüsh yighini" ning 26-iyuldiki xulase chiqirish künige toghra kelgen. 

Melum bolghinidek, ötken hepte washin'gtonda ötküzülgen "Diniy erkinlikni ilgiri sürüsh yighini" da amérikining mu'awin prézidénti mayk pens, amérika dölet ishliri ministirliqining ministiri mayk pompyo we amérikining b d t da turushluq bash elchisi nikki haléy qatarliq amérikining yuqiri derijilik emeldarliri xitayning Uyghurlargha qaratqan nöwettiki derijidin tashqiri teqiplirini qattiq eyibligen idi.

Mektupta mundaq déyilgen: "Erkin asiya radiyosi amérikidiki chet'ellerge qarita xewer béridighan 5 muhim taratquning biri. Uning Uyghur bölümi xitaydiki 12 milyondek türkiy tilliq Uyghur ahalilirige qarita Uyghur aptonom rayonida künséri nacharlishiwatqan kishilik hoquq ehwali heqqide ishenchlik we toghra bolghan xewerlerni bérip kelmekte. Erkin asiya radiyosi Uyghur bölümidiki zhurnalistlarning köp qismi amérika puqrasi yaki amérikining menggülük olturumigha érishken kishilerdur. Ularning xizmiti seweblik ularning xitaydiki ata-anilirini öz ichige alghan biwasite uruq-tughqanliri tutqun qilinishqa, türmige qamilishqa yaki mejburiy ghayib qilinishqa uchrimaqta. Bashqa bir chet memliketning uchigha chiqqan wasitilerni qollinip amérikidiki erkin asiya radi'osining ishlirigha mudaxile qilishi bizning jiddiy diqqet-étibarimizni qozghimaqta."

Mektupta yene mundaq déyilgen: "Biz janabingizning amérikining yuqiri derijilik diplomati bolush süpiti bilen xitay bilen bolghan diplomatik alaqilerde bu mesilini jiddiy bir mewqede otturigha élip chiqishingizni telep qilimiz. Shundaqla Uyghur zhurnalistlarning tutqun qilin'ghan yaki türmige qamalghan uruq-tughqanlirining hazir nede ikenlikini hemde ularning herqandaq bir pursette shertsiz qoyup bérilishi üchün küch chiqirishingizni soraymiz. Shuning bilen bir waqitta biz yene sizdin xitay hökümitige bu mesilining amérika hökümiti jiddiy köngül bölüwatqan we aldinqi orun'gha qoyuwatqan bir mesile ikenlikini éniq bildürüp qoyushingizni telep qilimiz."

Mezkur mektupni yazghan we imza qoyghan amérikidiki 6 neper sénator mark warnér, kori gardénér, tim kayné, marko rubiyo, édward markéy we stéw déynés qatarliqlar bolup, ular amérika qoshma shtatliridiki 100 neper sénator ichidiki tesiri küchlük siyasiyonlar hésablinidiken.

Toluq bet