Асия тәтқиқат җәмийити: «лагердики 386 нәпәр уйғур зиялийсиниң тәқдиридин әндишә қилмақтимиз»

Мухбиримиз шөһрәт һошур
2019-03-29
Елхәт
Пикир
Share
Принт

Хәлқарадики нопузлуқ тәтқиқат илмий җәмийәтләрдин болған асия тәтқиқат җәмийити түнүгүн, йәни 28-март күни баянат елан қилип, 2017 ‏-йилидин бери уйғур райондики аталмиш «қайта тәрбийә мәркәзлири» дә солинип ятқан 800 миңдин 2 милйонғичә тутқунниң тәқдиридин қаттиқ әндишә қиливатқанлиқини билдүрди.

Баянатта буниң бир инсан һәқлири дәпсәндичилики икәнлики шундақла илмий саһәгә нисбәтән ейтқанда, тәтқиқат әркинликиниң боғулуши икәнлики алаһидә әскәртилди. Баянатта йәнә мундақ дейилгән: «болупму биз из-дерики ғайиб болған, шинҗаң университетидин 21, шинҗаң педагогика университетидин 15, қәшқәр университетидин 13, медитсина университетидин 6, шинҗаң иҗтимаий пәнләр акадимийәсидин 6 нәпәр болуп, җәмий 386 нәпәр уйғур зиялийсиниң тәқдиридин қаттиқ әндишә қиливатимиз.»

Райондики йәрлик хәлқләрниң ана тилни қоллиниш вә «қуран» ни өгиниш әркинликиниң чәкләнгәнлики тилға елинған мәзкур баянатта чәтәлдә оқуп яки тәтқиқат билән шуғуллинип юртиға қайтқан илмий хадим вә оқуғучиларниң қаттиқ соал-сораққа дуч кәлгәнлики, қамаққа елинғанлиқи яки из-дерәксиз йоқалғанлиқи, һәтта бәзилириниң өлүм хәвириниң дәлилләнгәнлики тилға елинған.

Мәзкур җәмийәтниң тәрәпсиз бир илмий орган икәнлики, дуняда 7 миң әзаси бар хәлқаравий бир академик тәшкилат икәнлики билдүрүлгән бу баянатта хитай даирилириниң тутқундики илмий хадимлар вә оқуғучиларни қоюп бериши, уларни бихәтәр һалда аилиси вә иш орунлириға қайтишиға капаләтлик қилиши тәләп қилинған.

Мәлум болушичә, асия тәтқиқат җәмийити 23 ‏-март күни өткүзгән йиллиқ хизмәт хуласә йиғиниға америкадики уйғур адвокат нури түркәлниму тәклип қилған. Нури түркәл бу йиғинда уйғур райондики лагерлар вә лагердики уйғур зиялийлириниң әһвали һәққидә мәлумат бәргән.

Пикирләр (0)
Share
Толуқ бәт