Америка әмәлдари хитайни уйғур райониға «ясалма» зиярәтләрни тәшкилләш билән әйиблигән

Мухбиримиз әркин
2019-03-25
Елхәт
Пикир
Share
Принт

Америкиниң бир әмәлдари ройтерс агентлиқиға хитай һөкүмитиниң уйғур районида «ясалма» зиярәтләрни уюштуруп, кишиләрни қаймуқтуруватқанлиқи вә өзиниң мәзкур район һәққидики хата тәшвиқатини йейиватқанлиқини илгири сүргән.

Мәзкур америка әмәлдариниң хитай һөкүмити явропа дипломатлирини уйғур районида зиярәттә болушқа тәклип қилғанлиқини елан қилип арқидинла бу сөзләрни қилиши диққәт қозғиди.

Хитай һөкүмити өткән һәптә явропа дөләтлириниң дипломатлирини бу һәптә уйғур районида зиярәткә тәклип қилғанлиқини билдүргән иди. Ройтерс агентлиқиниң хәвәр қилишичә, исмини ашкарилашни халимайдиған юқириқи америка әмәлдари, американиң бейҗиңда турушлуқ баш әлчиси тәррий бранстад зиярәт тәклипидә болундиму? дегән соалға җаваб берип, бу тоғрисида бирәр сөһбәт яки зиярәтниң күнтәртипкә кәлмигәнликини билдүргән.

У: «бундақ ясалма һәм һөкүмәтниң йол башлишидики шинҗаң зиярити хитайниң райондики мәвҗут кишилик һоқуқ дәпсәндичиликиниң реаллиқини йошуруш, униң хата тәшвиқатини йейишқа хизмәт қилиду» дегән.

Хитай һөкүмити илгири русийә, пакистан, бангладәш, мисир қатарлиқ бир қисим диктатор дөләтләр, венгирийә, гретсийәдәк бәзи явропа дөләтлириниң дипломат вә мухбирлирини районда зиярәткә орунлаштуруп, үрүмчи вә қәшқәрдики алдин бәлгиләнгән аталмиш «кәспий тәрбийәләш мәркәзлири» ни зиярәт қилдурған иди.

Ройтерсниң хәвиридә қәйт қилинишичә, юқири америка әмәлдари хитайниң, йиғивелиш лагерлирини «кәспий тәрбийәләш мәркәзлири» яки «ятақлиқ мәктәпләр» дәп чүшәндүрүшиниң ишәнчлик әмәсликини тәкитләп: «биз хитайни давамлиқ бу сәлбий сиясәткә хатимә беришкә, халиғанчә тутқун қилинған барлиқ кишиләрни қоюп беришкә, шуниңдәк униң чәтәлдә олтурушлуқ мусулман аз санлиқ милләт әзалирини қайтип келишкә мәҗбурлап, уларни мәҗһул тәқдирдә қалдурушни тохтитишқа чақиримиз» дегән.

Хитай ташқи ишлар министирлиқи баянатчиси гең шуаң 25‏-март күни юқириқи америка әмәлдариниң сөзигә инкас қайтуруп, американиң тәнқидини «пакитқа уйғун әмәс», «пүтүнләй иғваға таянған вә боһтан» дәп әйиблигән. Лекин б д т ирқий айримичилиқни түгитиш комитети илгири хитайниң уйғурларни кәң көләмлик тутқун қилип, лагерларда тутуп туруватқанлиқиға даир ишәнчлик дәлилләрниң барлиқини билдүргән иди.

Пикирләр (0)
Share
Толуқ бәт