Amérika emeldari xitayni Uyghur rayonigha "Yasalma" ziyaretlerni teshkillesh bilen eyibligen

Muxbirimiz erkin
2019-03-25
Élxet
Pikir
Share
Print

Amérikining bir emeldari roytérs agéntliqigha xitay hökümitining Uyghur rayonida "Yasalma" ziyaretlerni uyushturup, kishilerni qaymuqturuwatqanliqi we özining mezkur rayon heqqidiki xata teshwiqatini yéyiwatqanliqini ilgiri sürgen.

Mezkur amérika emeldarining xitay hökümiti yawropa diplomatlirini Uyghur rayonida ziyarette bolushqa teklip qilghanliqini élan qilip arqidinla bu sözlerni qilishi diqqet qozghidi.

Xitay hökümiti ötken hepte yawropa döletlirining diplomatlirini bu hepte Uyghur rayonida ziyaretke teklip qilghanliqini bildürgen idi. Roytérs agéntliqining xewer qilishiche, ismini ashkarilashni xalimaydighan yuqiriqi amérika emeldari, amérikaning béyjingda turushluq bash elchisi terriy branstad ziyaret teklipide bolundimu? dégen so'algha jawab bérip, bu toghrisida birer söhbet yaki ziyaretning küntertipke kelmigenlikini bildürgen.

U: "Bundaq yasalma hem hökümetning yol bashlishidiki shinjang ziyariti xitayning rayondiki mewjut kishilik hoquq depsendichilikining ré'alliqini yoshurush, uning xata teshwiqatini yéyishqa xizmet qilidu" dégen.

Xitay hökümiti ilgiri rusiye, pakistan, ban'gladesh, misir qatarliq bir qisim diktator döletler, wén'giriye, grétsiyedek bezi yawropa döletlirining diplomat we muxbirlirini rayonda ziyaretke orunlashturup, ürümchi we qeshqerdiki aldin belgilen'gen atalmish "Kespiy terbiyelesh merkezliri" ni ziyaret qildurghan idi.

Roytérsning xewiride qeyt qilinishiche, yuqiri amérika emeldari xitayning, yighiwélish lagérlirini "Kespiy terbiyelesh merkezliri" yaki "Yataqliq mektepler" dep chüshendürüshining ishenchlik emeslikini tekitlep: "Biz xitayni dawamliq bu selbiy siyasetke xatime bérishke, xalighanche tutqun qilin'ghan barliq kishilerni qoyup bérishke, shuningdek uning chet'elde olturushluq musulman az sanliq millet ezalirini qaytip kélishke mejburlap, ularni mejhul teqdirde qaldurushni toxtitishqa chaqirimiz" dégen.

Xitay tashqi ishlar ministirliqi bayanatchisi géng shu'ang 25‏-mart küni yuqiriqi amérika emeldarining sözige inkas qayturup, amérikaning tenqidini "Pakitqa uyghun emes", "Pütünley ighwagha tayan'ghan we bohtan" dep eyibligen. Lékin b d t irqiy ayrimichiliqni tügitish komitéti ilgiri xitayning Uyghurlarni keng kölemlik tutqun qilip, lagérlarda tutup turuwatqanliqigha da'ir ishenchlik delillerning barliqini bildürgen idi.

Toluq bet