Tonulghan mutexessisler birleshme agéntliqinbing xewirige inkas qayturdi: "Uyghur élida zulum dawam qiliwatidu"

Muxbirimiz irade
2021-10-13
Share

Birleshme agéntliqining muxbiri yéqinda özining xitayning teklipige bina'en Uyghur éligha qilghan sepirining tepsilatini élan qilghan idi. Ziyaret xatiriside muxbir Uyghur élidiki ammiwiy qurulushlargha orunlashturulghan tikenlik sim tosaqlarning éliwétilgenlikini, kocha-koylardiki bironéwik we kamiralar yoqalghanliqi, nurghun tekshürüsh ponkitliri we saqchi ponkitlirining ghayib bolghanliqini bayan qilghan.

Gerche muxbir xewiride rayondiki irqiy ayrimichiliqning yenila roshenlikini, Uyghurlarning mewhum bir sistéma ichide her bir herikiti cheklinip yashaydighanliqini tekitligen bolsimu, bu xewer ijtima'iy taratqularda bir qisim kishilerning Uyghur élida irqiy qirghinchiliq ayaqliship, hemme ishlar normal haletke qaytti, dégen mulahizilerni qilishigha seweb bolghan idi.

Halbuki, bundaq mulahizilerge Uyghur tetqiqati boyiche tonulghan chet ellerdiki mutexessisler kéchikmestin inkas qayturdi. Ular tiwittérdiki inkaslirida bundaq köz qarashlarni "Intayin xeterlik" dep körsetti.

Uyghurlarning mejburiy qul emgikige séliniwatqanliqigha da'ir intayin muhim doklatning yazghuchisi bolghan tetqiqatchi wiki shü tiwittérda töwendikilerni yazghan: "Bezi ijtima'iy taratqu közneklirining bir xewer asasida shinjangdiki wehshiylikning axirlashqanliqini élan qilmaqchi bolushi, méni tolimu ensiretti. Shinjangdiki kishilik hoquq weyranchiliqi peqet nechche yüzligen 'qayta terbiyilesh' lagéridin ibaret emes, belki u tüptin özgertiliwatqan we tengpungluqi buzulghan bir jem'iyetning peqet birla teripi. Rayonda bir milletning yene bir milletke qarshi döletning qollishidiki zorawanliq yürgüzüliwatidu. Bu zorawanliq hélihem dawam qiliwatidu, nurghun kishiler hélihem türmilerde qamilip yétiwatidu. . ."

Tonulghan xitay ishliri mutexessisi, tarixshunas jéymis milward wiki shüning yuqiriqi'i sözini qollap, buni "Intayin zörür bolghan tüzitish boldi" dégen.

Amérikadiki yene bir tonulghan siyasiy ishlar mutexessisi, téksas unwérsititining proféssori shina gréytins xanimmu bu heqte inkas yézip: "Birleshme agéntliqi muxbirining yéqinqi xewiri méni köp oylandurdi. Biz bu yerde diqqet qilishimiz kérekki, köz bilen körgili bolidighan basturush wastilirining bolmasliqi dölet kontrolining boshighanliqidin dérek bermeydu. Eksiche köz bilen körgili bolidighan zorawanliq döletning bashqa charisi qalmighanliqini körsitip béridu," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet