Uyghur isim-famililirining xitayche yézilishidiki qalaymiqanchiliq “Milletler ittipaqliqi yili” bashlan'ghanda andin nezerge élin'ghan

“Xelq tori” Uyghurche qanilining xewirige qarighanda, Uyghur isim-famililirining xitayche resmiy höjjet we kinishkilerge yézilishidiki qalaymiqanchiliq we buningdin kélip chiqqan éghir qolaysizliq yéqinda xitay hökümiti békitken “Milletler ittipaqliqi yili” da andin nezerge élin'ghan.

29-Mart küni échilghan Uyghur aptonom rayonining “Milletler ittipaqliqi  yili” seperwerlik chong yighinining guruppa muzakiriside bu mesile tunji qétim otturigha qoyulghan.

Mezkur yighinda bu mesilini otturigha qoyghanlarning ichide ma'arip nazaritining naziri tursun ibrahimmu bar iken.

U öz isim familisining xitayche resmiy höjjet we kinishkilerde türlük xetler bilen yézilidighanliqini, hetta isim bilen famile arisigha qoyulidighan chékitning ornimu dawamliq özgirip turidighanliqini tilgha alghan.

Melumki, Uyghurlarning isim-famililiri uzaqtin buyan xitay hökümiti tarqatqan türlük kinishka, diplom, passport, kimlik we bashqa qanuniy höjjetlerde xitayche oxshimighan xetler bilen yézilip kelgen. Hetta pasportta Uyghur isim-famililirining tertipi mejburiy yosunda xitayche tertipte yézilip, isim bilen familining orni almiship qalidighan  ehwallar hazirghiche dawamliship kelgen idi.

Közetküchiler, Uyghurlarning isim-familisining xitayche yézilishidiki bu xil qalaymiqanchiliqning nechche on yil dawamliship, peqet bu yil bashlan'ghan “Milletler ittipaqliqi yili” da andin nezerge élinishini “Ejeblinerlik weqe” dep qarimaqta.