Körgezmide Uyghurche kiyiniwalghan xitay pa'aliyetchiler Uyghur tamashibinning naraziliqigha uchridi

Muxbirimiz shöhret hoshur
2018-02-26
Élxet
Pikir
Share
Print

Bügün ijtima'iy axbarat wasitiliride tarqalghan bir uchurdin melum bolushiche, yéqinda washin'gton etrapida élip bérilghan xitay pa'aliyetchilerning bir körgezme pa'aliyiti bir Uyghur tamashibinning naraziliqini qozghighan.

Uchurdin körülüshiche, körgezmide bir qisim xitay pa'aliyetchiler Uyghurche kiyim kiyip, teshwiqat pa'aliyiti élip barghan, bu ehwal körgezmige kelgen bir Uyghur tamashibinning naraziliqini qozghighan. U Uyghurche kiyiwalghan xitay pa'aliyetchilerdin awwal "Siz Uyghurmu?" dep sorighan, pa'aliyetchiler: "Yaq" dep jawab bergendin kéyin, u pa'aliyetchilerning qilmishini soraqqa tartqan.

Uyghur rayonida minglarche kishining türmilerde solunuwatqanliqi we öltürülüwatqanliqini tilgha alghan bu Uyghur tamashibin, xitay pa'aliyetchilerni saxtipezlik qilish, yeni Uyghur weziyitini amérika jem'iyitige xata tonushturush bilen eyibligen. Teleppuzidin qattiq ghezeplen'genliki melum bolghan Uyghur tamashibin xitay pa'aliyetchilerning bu meydandiki qiyapitini qoy térisige oriniwalghan börilerge oxshatqan.

So'al sorashta passip halgha chüshken xitay pa'aliyetchiler, özliri mensup bolghan teshkilatning plakatini körsitip turup, so'algha jawab bérishtin özini qachurghan.

Plakattiki herplerdin melum bolushiche, bu körgezme, amérikining mariyland shtatida qurulghan CCACC, yeni xitay medeniyiti we jama'iti pa'aliyet merkizi namliq teshkilat teripidin élip bérilghan. Körgezmige naraziliq bildürgen Uyghurning kimliki, mezkur körgezmini körüsh üchün yaki közitish üchün barghanliqi hazirche melum emes.

Inkaslardin melum bolushiche, xitay da'irilirining Uyghur diyarida élip bériwatqan teqiblesh siyasiti, minglighan Uyghurlarni "Yépiq terbiyelesh lagérliri"gha qamishi, hemme jayda kaméraliq nazaret qilish sistémisi ornitishi, chet'ellerdiki uruq-tughqanliri bilen bolghan alaqilerni qamal qilishi chet'ellerdiki Uyghurlar arisidimu küchlük naraziliqlarni qozghimaqta.

Toluq bet