Хитайниң аманлиқ тәдбирлири қәшқәр қатарлиқ җайларда нурғун дуканларниң тақилип қелишиға сәвәб болған

Мухбиримиз әркин
2019-01-04
Елхәт
Пикир
Share
Принт

Хитай даирилири 2016‏-йилниң ахирлиридин башлап уйғур районида тиҗарәтчиләрни һәрикәтләндүрүп, уларни «террорлуқ» қа қарши нурғун аманлиқ тәдбирлирини елишқа мәҗбурлиған иди.

Италийәдики «зимистан» намлиқ диний әркинлик ториниң ашкарилишичә, нөвәттә бу хил аманлиқ тәдбирлири қәшқәр қатарлиқ җайларда тиҗарәтчиләргә еғир зиян селип, нурғун дуканларниң тақилип қелишини кәлтүрүп чиқармақта икән. Йеқинда қәшқәр шәһириниң «ғәрбий дияр» кочисиға җайлашқан бир қанчә дукан шу сәвәблик тақиветилгән.

«Зимистан» ториниң хәвиридә ашкарилинишичә, бир күни мәзкур кочиға җайлашқан бир һарақ-тамака дукини мал чүшүргән. Дукандар мал чүшүрүватса сақчилар дәрһал йетип келип йүк аптомобилини дәрһал йөткәшни тәләп қилған. Аптомобилниң шопури сақчиларға бир қанчә еғиз сөз қайтуруп қойғанлиқи үчүн мәзкур дукан тақиветилгән. «Ғәрбий дияр» кочисидики йәнә бир дукандин сақчилар токлуқ гүрүч дүмләш кориси байқилип қалғанлиқи үчүн бу дуканни тақивәткән.

«Зимистан» ториниң хәвиридә баян қилинишичә, дукандар сақчиларға тилхәт йезип берип дуканда һәргиз токлуқ кора сақлимаслиққа вәдә қилғандин кейин униң дуканни қайта ечишиға рухсәт қилған. Бундақ вәқә охшаш мәзгилдә йәнә «ғәрбий дияр» кочисидики икки ашпузулниң бешиға кәлгән. Бу кочидики бир тоху қордақханисиниң хоҗайини «маневир» ға вақтида үлгүрүп чиқмиғанлиқи үчүн дукини тақалған. Бу кочидики йәнә бир ашпузул «зерәк аял ләғмәнханиси» пичақни зәнҗирлимигәнлики үчүн «террорлуқ қарши туруш бәлгилимисигә хилаплиқ қилди» дәп тақиветилгән. Лекин хәвәрдә бу икки ашпузулниң хоҗайинлириниң қандақ бир тәрәп қилинғанлиқи тилға елинмиған.

«Зимистан» ториниң хәвиридә хитай даирилириниң «иҗтимаий муқимлиқ» ни қоғдаш намида ушшақ тиҗарәтчиләргә селиватқан паракәндичилики уларға еғир зиянларни селип, нурғун аилиләрниң киримсиз қелишини кәлтүрүп чиқарғанлиқини билдүргән. Уйғур кишилик һоқуқ тәшкилатлириниң илгири сүрүшичә, хитай даирилириниң 2017‏-йили 2‏-айдин башланған кәң көләмлик тутқунда нурғун уйғур ушшақ тиҗарәтчиләр тутқун қилинип, лагерларға қамалған. Буму нурғун дуканларниң тақилишини кәлтүрүп чиқарған икән.

Пикирләр (0)
Share
Толуқ бәт