Xitayning amanliq tedbirliri qeshqer qatarliq jaylarda nurghun dukanlarning taqilip qélishigha seweb bolghan

Muxbirimiz erkin
2019-01-04
Élxet
Pikir
Share
Print

Xitay da'iriliri 2016‏-yilning axirliridin bashlap Uyghur rayonida tijaretchilerni heriketlendürüp, ularni "Térrorluq" qa qarshi nurghun amanliq tedbirlirini élishqa mejburlighan idi.

Italiyediki "Zimistan" namliq diniy erkinlik torining ashkarilishiche, nöwette bu xil amanliq tedbirliri qeshqer qatarliq jaylarda tijaretchilerge éghir ziyan sélip, nurghun dukanlarning taqilip qélishini keltürüp chiqarmaqta iken. Yéqinda qeshqer shehirining "Gherbiy diyar" kochisigha jaylashqan bir qanche dukan shu seweblik taqiwétilgen.

"Zimistan" torining xewiride ashkarilinishiche, bir küni mezkur kochigha jaylashqan bir haraq-tamaka dukini mal chüshürgen. Dukandar mal chüshürüwatsa saqchilar derhal yétip kélip yük aptomobilini derhal yötkeshni telep qilghan. Aptomobilning shopuri saqchilargha bir qanche éghiz söz qayturup qoyghanliqi üchün mezkur dukan taqiwétilgen. "Gherbiy diyar" kochisidiki yene bir dukandin saqchilar tokluq gürüch dümlesh korisi bayqilip qalghanliqi üchün bu dukanni taqiwetken.

"Zimistan" torining xewiride bayan qilinishiche, dukandar saqchilargha tilxet yézip bérip dukanda hergiz tokluq kora saqlimasliqqa wede qilghandin kéyin uning dukanni qayta échishigha ruxset qilghan. Bundaq weqe oxshash mezgilde yene "Gherbiy diyar" kochisidiki ikki ashpuzulning béshigha kelgen. Bu kochidiki bir toxu qordaqxanisining xojayini "Manéwir" gha waqtida ülgürüp chiqmighanliqi üchün dukini taqalghan. Bu kochidiki yene bir ashpuzul "Zérek ayal leghmenxanisi" pichaqni zenjirlimigenliki üchün "Térrorluq qarshi turush belgilimisige xilapliq qildi" dep taqiwétilgen. Lékin xewerde bu ikki ashpuzulning xojayinlirining qandaq bir terep qilin'ghanliqi tilgha élinmighan.

"Zimistan" torining xewiride xitay da'irilirining "Ijtima'iy muqimliq" ni qoghdash namida ushshaq tijaretchilerge séliwatqan parakendichiliki ulargha éghir ziyanlarni sélip, nurghun a'ililerning kirimsiz qélishini keltürüp chiqarghanliqini bildürgen. Uyghur kishilik hoquq teshkilatlirining ilgiri sürüshiche, xitay da'irilirining 2017‏-yili 2‏-aydin bashlan'ghan keng kölemlik tutqunda nurghun Uyghur ushshaq tijaretchiler tutqun qilinip, lagérlargha qamalghan. Bumu nurghun dukanlarning taqilishini keltürüp chiqarghan iken.

Toluq bet