Мая ваң: «роһингадикичилик ахбарат әркинлики шинҗаңда мәвҗут әмәс»

Мухбиримиз шөһрәт һошур
2018-08-29
Share

Мухбирларниң хитайдин һәйдилиш мәсилиси үстидә бүгүн, йәни 29-авғуст күни мақалә елан қилған «хәлқара кишилик һоқуқни көзитиш тәшкилати» ниң тәтқиқатчиси мая ваң уйғур районидики йиғивелиш лагерлириниң бүгүнки вәзийитидә, болупму дуняниң униңға аҗиз инкас қайтурушида уйғур райондики ахбарат чәклимисиниң муһим рол ойнаватқанлиқини илгири сүрди.

Америкилиқ мухбир мега раҗагопалан вә франсийәлик мухбир урсула ханимларниң уйғур вәзийити һәққидә хәвәр бәргәнлики үчүн визисиниң узартилмиғанлиқи вә хитайдин һәйдәлгәнлики үстидә тәпсилий тохталған мая ваң: «әгәр худди роһингада болғандәк уйғур райониғиму мухбирлар сәп-сәп болуп келәлигән, халиғанчә сүрәткә тарталиған вә синға алалиған болса роһингалиқларниң авази дуняға йәткәндәк уйғурларниңму авази дуняға йетәрлик дәриҗидә аңланған болатти. Йәнә келип дуня җамаәтчиликиниң уйғур вәзийитигә қарита һазирқидинму җиддийрақ һәрикәткә өтүш еһтимали болған болатти» дәп язған.

Бу кишилик һоқуқ паалийәтчилириниң уйғур вәзийити билән роһеңга вәзийити һәққидә тунҗи қетим селиштурма елип бериши әмәс. Дуня уйғур қурултийиниң алий рәһбири рабийә қадир ханим өткән йили хитайниң б д т да роһеңга мәсилисидә берма һөкүмитини қоллишиниң сәвәби үстидә мақалә елан қилип, уйғур вәзийитиниң роһеңга вәзийитидин қелишмайдиғанлиқини, шуңа хитай даирилириниң берма һөкүмитини қоллиғанлиқини оттуриға қойған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.