Хитай уйғур диярида айродром кеңәйтиш қурулуши елип бармақчи

Мухбиримиз сада
2018-11-20
Елхәт
Пикир
Share
Принт

1 Милйондин артуқ уйғур қатарлиқ мусулманларниң һәр хил лагерларда изтирап чекиватқанлиқи әйибләшкә учраватқан бир пәйттә, хитай һөкүмити уйғур дияриниң мәркизи болған үрүмчидә 42 милярд 100 милйон йүәнлик айродром кеңәйтиш қурулушини тәстиқлиған.

Ройтерсниң бу һәқтики хәвиригә қариғанда, дөләтлик тәрәққият вә ислаһат комитети дашиң айропорт қурулушниң үрүмчиниң «хәлқаралиқ һава қатниши түгүнигә айлиниш тәрәққиятини илгири сүридиғанлиқи» ни билдүргән.

Хәвәрдин мәлум болушичә, даириләр мәзкур қурулушниң 2030-йилиға қәдәр давамлишидиғанлиқи, кеңәйтилгән айродромниң һәр йилиға 63 милйон йолучи вә 750 миң тонна йүк тошиялайдиғанлиқини билдүргән.

Бу қетимлиқ қурулушта әсли бар болған учуш-қонуш йолиниң йениға йәнә икки йол қошуп кеңәйтилидикән.

Хәвәрдә нефит вә қезилма байлиқ мол болған уйғур дияриниң хитай рәиси ши җинпиңниң «бир йол, бир бәлвағ» пиланидики асасий түгүн икәнлики, шу вәҗидин йеқиндин буян бу районда ул әслиһә қурулушиниң әвҗ еливатқанлиқи баян қилинған.

Һалбуки, бир қисим көзәткүчиләрниң билдүрүшичә, хитай һөкүмити районда милйондин артуқ адәмни тутуп туруш лагерлириға солап туруп, әмдиликтә районниң асасий муәссәсә қурулушиға зор дәриҗидә мәбләғ селиши шүбһилик икән.

Уларниң қаришичә, ши җинпиң башлиған аталмиш «бир йол бир бәлвағ» қурулушидин кейин уйғур қатарлиқ йәрлик милләтләргә қаритилған зулумлар һәссиләп ашқан. Шу вәҗидин мәзкур кеңәйтилгән айродром қурулушиму йәрликләргә һечқандақ мәнпәәт елип келәлмәйдикән.

Пикирләр (0)
Share
Толуқ бәт