Xitay Uyghur diyarida ayrodrom kéngeytish qurulushi élip barmaqchi

Muxbirimiz sada
2018-11-20
Élxet
Pikir
Share
Print

1 Milyondin artuq Uyghur qatarliq musulmanlarning her xil lagérlarda iztirap chékiwatqanliqi eyibleshke uchrawatqan bir peytte, xitay hökümiti Uyghur diyarining merkizi bolghan ürümchide 42 milyard 100 milyon yüenlik ayrodrom kéngeytish qurulushini testiqlighan.

Roytérsning bu heqtiki xewirige qarighanda, döletlik tereqqiyat we islahat komitéti dashing ayroport qurulushning ürümchining "Xelq'araliq hawa qatnishi tügünige aylinish tereqqiyatini ilgiri süridighanliqi" ni bildürgen.

Xewerdin melum bolushiche, da'iriler mezkur qurulushning 2030-yiligha qeder dawamlishidighanliqi, kéngeytilgen ayrodromning her yiligha 63 milyon yoluchi we 750 ming tonna yük toshiyalaydighanliqini bildürgen.

Bu qétimliq qurulushta esli bar bolghan uchush-qonush yolining yénigha yene ikki yol qoshup kéngeytilidiken.

Xewerde néfit we qézilma bayliq mol bolghan Uyghur diyarining xitay re'isi shi jinpingning "Bir yol, bir belwagh" pilanidiki asasiy tügün ikenliki, shu wejidin yéqindin buyan bu rayonda ul eslihe qurulushining ewj éliwatqanliqi bayan qilin'ghan.

Halbuki, bir qisim közetküchilerning bildürüshiche, xitay hökümiti rayonda milyondin artuq ademni tutup turush lagérlirigha solap turup, emdilikte rayonning asasiy mu'essese qurulushigha zor derijide meblegh sélishi shübhilik iken.

Ularning qarishiche, shi jinping bashlighan atalmish "Bir yol bir belwagh" qurulushidin kéyin Uyghur qatarliq yerlik milletlerge qaritilghan zulumlar hessilep ashqan. Shu wejidin mezkur kéngeytilgen ayrodrom qurulushimu yerliklerge héchqandaq menpe'et élip kélelmeydiken.

Toluq bet