Хитай һөкүмитиниң балиларни ата-анисидин айриветиш қилмиши тәнқидләнмәктә

Мухбиримиз әзиз
2018-09-25
Елхәт
Пикир
Share
Принт

Уйғурлар дияридики сиясий бастурушта йүз миңлиған ата-аниларниң лагерларға қамилиши һәмдә бу сәвәбтин қаранчуқсиз қалған миңлиған уйғур пәрзәнтлириниң хитай һөкүмити тәсис қилған дарилетамларға әвәтилиши ғәрб дунясиниң җиддий диққитини қозғаватқанлиқи мәлум.

«Вашингтон почтиси» гезитиниң 24-сентәбир санида елан қилинған бу һәқтики тәһрират мақалисида бу һадисә америка президенти доналд трампниң қанунсиз мексика көчмәнлирини пәрзәнтлири билән қайтидин җәм қилиш сиясити билән селиштурулди. Шуниңдәк хитай һөкүмитиниң қилмиши «аллиқачан тарихтин йүткән вәһшиянә сиясәтни йеңиваштин иҗра қилиш» дәп әйибләнди.

Мәзкур мақалида һазир һәрхил намлардики дарилтам ларға әвәтиливатқан гөдәкләрниң лагерлардики ата-анилириға охшаш өз ана тилидин вә ислам етиқадидин ваз кечип хитайчә сөзләшкә, хитай компартийәсини сөйүшкә мәҗбурлиниватқанлиқи баян қилиниду һәмдә бу һал «‹мәдәнийәт зор инқилаби' дин буянқи әң зор инсан һәқлири дәпсәндичилики» дәп тәсвирлиниду. Мақалида көрситилишичә, бу хил дарилтамлар тикәнлик сим тосақлар билән қоршалған болуп, оқутуш ишлири қораллиқ сақчиларниң көзәтчиликидә давам қилмақта икән.

Апторлар йәнә бирләшмә агентлиқниң бу һәқтики тәкшүрүш доклатидин нәқилләр кәлтүрүп, бу хил аиливи җудалиқниң ялғуз ата-анилири лагерларға соланған өсмүрләргила әмәс, барлиқ уйғур пәрзәнтлиригә ортақ икәнликини алға сүриду. Униңда көрситилишичә, хитай һөкүмити ятақлиқ мәктәп тори бәрпа қилған болуп, шу җайдики ата-аниларниң билдүрүшичә һәрқандақ уйғур бала мушу мәктәпләргә бериши шәрт икән.

Шәкил җәһәттә дарилетамларға охшайдиған бу мәктәпләрдики балиларни йоқлимақчи болған ата-анилар һәптисигә бир қетим көрүшәләйдикән. Бир уйғур аял бу һәқтә сөз қилип «бизни һәр чаршәнбә күни бир қетим көрүштүриду. Баламға алғач кәлгән кәмпитни ришаткиниң бу йеқидин у тәрәптики оғлумға сунуп бәрдим» дегән.

Мақалиниң ахирида хитайдики бу һадисиниң хәлқараниң техиму зор диққитини тартишқа тегишлик икәнлики қәйт қилиниду.

Пикирләр (0)
Share
Толуқ бәт