Уйғур районида пуқралар «қара гуруһлар вә рәзил күчләр» ни паш қилишқа мәҗбурланмақта

Мухбиримиз әркин
2019-04-22
Елхәт
Пикир
Share
Принт

Хитайниң уйғур районида башлиған «қара гуруһларни тазилаш, рәзилликни түгитиш» долқуни кәң көләмлик паш қилиш һәрикитигә айланмақта. Хитай таратқулириниң ашкарилишичә, йәрлик даириләр пуқраларни аммиви йиғин, сиясий өгинишләргә тәшкилләп, кишиләрниң садир қилған «рәзиллик» кә даир қилмиши яки «қара гуруһлар» билән болған алақисини паш қилишини тәләп қилған.

Йәрлик таратқуларниң 22‏-апрел бәргән хәвиридә, даириләрниң пуқралар үчүн мәхсус паш қилиш сандуқи тәсис қилғанлиқи билдүрүлгән. Мәлум болушичә, ақту бу һәрикәт әң шиддәтлик елип бериливатқан наһийәләрниң бири болуп, йәрлик даириләр пуқраларниң «қара гуруһлар» билән алақиси бар яки «рәзил» қилмиш садир қилған, дәп қаралған кишиләрни паш қилишини тәләп қилмақта икән. Нөвәттә, уйғур районида кәң қанат яйдурулуватқан бу һәрикәт уйғур кишилик һоқуқ тәшкилатлирини әндишигә салмақта. Уларниң қаришичә, хитай һөкүмити 2 милйондәк уйғур, қазақ вә башқа мусулман милләтләрни йиғивелиш лагериға қамап, лагер сиртидики уйғурларни қаттиқ тәқиб астида тутуватқан мәзгилдә қозғиған бу һәрикәт, униң техиму көп уйғурға қамақ җазаси бериш яки лагерларға солаш үчүн чиқарған васитилириниң бири икән. Қизилсу областлиқ һөкүмәт ториниң 20‏-апрел хәвиридә ашкарилинишичә, даириләр ақту наһийисидә йәнә көчмә нопус вә өй иҗарә беришни «қара гуруһларни тазилаш, рәзилликни түгитиш» һәрикитиниң зәрбә бериш нишаниға айландурған. Наһийилик партком 20‏-апрел күни наһийәдики алақидар органларниң кадирлирини йиғинға чақирип, «қара гуруһларни тазилаш вә рәзилликни түгитиш» күришиниң нишани сүпитидә пуқраларни сәпәрвәр қилип, көчмә нопус вә өй иҗарә беришни контрол қилишни күчәйтишни тәләп қилған. Буниң алдида уйғур аптоном районлуқ интизам тәкшүрүш комитети «қара күчләрни тазилаш вә рәзилликни түгитиш» сәпәрвәрлик йиғини чақирип, «қара гуруһлар» вә «рәзил күчләр» ниң арқисидики «һимайичилири» гә зәрбә беришни тәкитлигән иди.

Пикирләр (0)
Share
Толуқ бәт