Uyghur rayonida puqralar "Qara guruhlar we rezil küchler" ni pash qilishqa mejburlanmaqta

Muxbirimiz erkin
2019-04-22
Élxet
Pikir
Share
Print

Xitayning Uyghur rayonida bashlighan "Qara guruhlarni tazilash, rezillikni tügitish" dolquni keng kölemlik pash qilish herikitige aylanmaqta. Xitay taratqulirining ashkarilishiche, yerlik da'iriler puqralarni ammiwi yighin, siyasiy öginishlerge teshkillep, kishilerning sadir qilghan "Rezillik" ke da'ir qilmishi yaki "Qara guruhlar" bilen bolghan alaqisini pash qilishini telep qilghan.

Yerlik taratqularning 22‏-aprél bergen xewiride, da'irilerning puqralar üchün mexsus pash qilish sanduqi tesis qilghanliqi bildürülgen. Melum bolushiche, aqtu bu heriket eng shiddetlik élip bériliwatqan nahiyelerning biri bolup, yerlik da'iriler puqralarning "Qara guruhlar" bilen alaqisi bar yaki "Rezil" qilmish sadir qilghan, dep qaralghan kishilerni pash qilishini telep qilmaqta iken. Nöwette, Uyghur rayonida keng qanat yayduruluwatqan bu heriket Uyghur kishilik hoquq teshkilatlirini endishige salmaqta. Ularning qarishiche, xitay hökümiti 2 milyondek Uyghur, qazaq we bashqa musulman milletlerni yighiwélish lagérigha qamap, lagér sirtidiki Uyghurlarni qattiq teqib astida tutuwatqan mezgilde qozghighan bu heriket, uning téximu köp Uyghurgha qamaq jazasi bérish yaki lagérlargha solash üchün chiqarghan wasitilirining biri iken. Qizilsu oblastliq hökümet torining 20‏-aprél xewiride ashkarilinishiche, da'iriler aqtu nahiyiside yene köchme nopus we öy ijare bérishni "Qara guruhlarni tazilash, rezillikni tügitish" herikitining zerbe bérish nishanigha aylandurghan. Nahiyilik partkom 20‏-aprél küni nahiyediki alaqidar organlarning kadirlirini yighin'gha chaqirip, "Qara guruhlarni tazilash we rezillikni tügitish" kürishining nishani süpitide puqralarni seperwer qilip, köchme nopus we öy ijare bérishni kontrol qilishni kücheytishni telep qilghan. Buning aldida Uyghur aptonom rayonluq intizam tekshürüsh komitéti "Qara küchlerni tazilash we rezillikni tügitish" seperwerlik yighini chaqirip, "Qara guruhlar" we "Rezil küchler" ning arqisidiki "Himayichiliri" ge zerbe bérishni tekitligen idi.

Toluq bet