Xitay hökümiti "Bingtu'en" ning ornini kücheytishke bu yil dawamliq meblegh ajratqan

Muxbirimiz erkin
2018-05-07
Élxet
Pikir
Share
Print

Xitay hökümiti yéqinda "Shinjang ishlepchiqirish-qurulush bingtu'enni" ning asasi qatlam qurulushini dawamliq kücheytishke bu yil yene zor miqdarda pul ajratqan.

Shinxu'a agéntliqining xewer qilishiche, xitay hökümiti Uyghur rayonidiki mezkur yérim qoralliq, yérim iqtisadi gewdining bu yilliq ma'arip, ishqa orunlishish, sheher-yéza qurulushi, ammiwi mulazimet, namratlarni yölesh qatarliq 10 xil qurulush türige 34 milyard 200 milyon yüen ajratqanliqini élan qilghan.

Xitay da'irilirining "Bingtu'en" ge sélinmini köpeytip, uning Uyghur rayonining jenubigha qarap tereqqiy qilishini algha sürüsh we "Bingtu'en" üchün zor yene zor meblegh ajritish qarari amérikidiki Uyghur kishilik hoquq qurulushining ötken hepte élan qilghan "Bingtu'en" heqqidiki doklatidin kéyin élan qilindi. Uyghur kishilik hoquq qurulushi doklatida, mezkur yérim qoralliq, yérim iqtisadi organni xitayning "Sherqiy türkistandiki mustemlikichilik apparati" dep tenqid qilghan.

Doklatta, uning muhit, yerlik xelqning iqtisadi turmushi we bixeterlikige zor tehdit ikenliki eskertilip, xitay hökümitini mezkur organ'gha xitay köchmenlirini qobul qilishni toxtitishqa we uni tarqitiwétishqa, uning ilkidiki yer-zémin we tebi'iy bayliqlarni yerlik xelqqe ötküzüp bérishke chaqirghan idi.

Lékin, "Bingtu'en" tereqqiyat-islahat komitéti shinxu'a agéntliqigha bergen uchurida, yuqiriqi mebleghning "Bingtu'en" ning "Jenubqa qarap tereqqiy qilishi, bingtu'en ezalirining turmushini özgertish we uninggha kapaletlik qilish, yéza-kentlerni bir tutash pilanlash, bingtu'en bilen yerlikning ariliship kétishi qatarliq nuqtiliq qurulushlarni qollash" qa serp qilinidighanliqini bildürgen.

Xitay hökümiti 2006‏-yildin béri "Bingtu'en" ni kücheytishke her yili zor miqdarda meblegh ajritip, bu arqiliq Uyghurlarni kontrol qilishni pilanlap keldi. Xitay hökümitining "Bingtu'en" ge salghan meblighi yéqinqi 12 yilda az kem 40 hesse köpeygen. 2017‏-Yili uning "Bingtu'en" ge eng köp meblegh salghan bir yil bolghan. Shinxu'a agéntliqining xewiridin melum bolushiche, uning 2017‏-yili "Bingtu'en" ge salghan meblighi bu yilqidin 8 milyard yüen artuq iken.

Toluq bet