Uyghur diyaridiki bingtu'en da'iriliri xitay ölkiliridin yene 4000 neper xizmetchi qobul qilidiken

Muxbirimiz irade
2018-05-10
Élxet
Pikir
Share
Print

Uyghur diyaridiki ishlepchiqirish-qurulush armiyesi, yeni bingtu'en yéqinda uqturush chiqirip, aliy mektep püttürgen 4000 studéntni xizmetke qobul qilidighanliqini jakarlighan. "Xitay xewerler tori" ning xewirige qarighanda, bingtu'en da'iriliri qobul qilmaqchi bolghan aliy mektep oqughuchilirining hemmisi xitay ölkilerdin tallinidiken.

Bu heqtiki axbarat élan qilish yighinida bingtu'en da'iriliri yéngidin memurluqqa qobul qilinidighan omumiy oqughuchi sanning 4017 neper bolidighanliqini, buning esli pilan qilin'ghan 2364 neperdin bir hesse dégüdek köp ikenlikini bildürgen.

Qiziqarliqi shuki, buning bilen oxshash bir waqitta Uyghur aptonom rayonluq da'iriler bu yil Uyghur élida aliy mektep püttürgen oqughuchilardin 1102 nepirining xitay ölkilirige "Terbiye" linishke ewetilidighanliqini jakarlighan. "Tengritagh tori" ning bu heqtiki xewiride bu oqughuchilarning "2018 Yili Uyghur aptonom rayonidiki adettiki aliy mekteplerni püttürgen oqughuchilardin ichkiri ölke we sheherlerge terbiyelinishke ewetish heriket pilani" boyiche ewetilidighan tötinchi türkümdiki yashlar ikenliki ilgiri sürülgen.

Chet'ellerdiki Uyghur közetküchiler, "Xitay ölkiliridin Uyghur élige her yili minglap-on minglap xitay köchmenliri yötkilip ishqa orunlashturuluwatqan bir shara'itta Uyghur yashlirining xitay ölkilirige yolgha sélinishi, Uyghur yashlirini meqsetlik halda tarqaqlashturush siyasitining bir yüzidur," dep körsetmekte.

Toluq bet