Uyghur élide turushluq bingtu'en yene jem'iyettin 1277 neper adem qobul qilidiken

Muxbirimiz irade
2020-07-14
Share

Xitayning Uyghur élide turushluq ishlepchiqirish-qurulush armiyesi bingtüen yéqindin buyan köplep ishchi-xizmetchi qobul qilip, ichkiri ölkilerdin Uyghur élige adem yötkeshke zor küch serp qilmaqta. Xitayning "Shinjang géziti" tarqatqan xewiridin qarighanda, bingtu'en bu yil yene jem'iyettin 1277 neper memuriy xadim qobul qilidiken.

Nöwette "Bingtüen" Uyghurlar zich olturaqlashqan jenubiy rayonlargha kéngiyishni yolgha qoyuwatqan bolup, u ichkiri xitaydin köplep adem yötkeshni tézletmektiken.

Nöwette uniwérsitétlarni püttürgen aliy mektep oqughuchiliri xizmet izdewatqan mezgil bolghanliqtin Uyghur élidiki herqaysi hökümet orunliri we xususiy karxanilarning buni xitay ölkiliridin Uyghur élige adem yötkesh üchün pursetke aylanduruwatqanliqi melum. Téxi yéqinda xitay dölet re'isi shi jinping özi biwasite xitay néfit uniwérsitétining qaramaydiki shöbisini püttürgen aliy mektep oqughuchilirigha xet yézish arqiliq ularning Uyghur élide qélishni tallighanliqini medhiyiligen we netijide xitaydiki aliy mekteplerde "Shi jinping xétining rohini öginish, tarixiy burchni zimmisige élip shinjangda yiltiz tartish" tin ibaret chaqiriq qozghalghan.

Uyghur rayon da'iriliri xitay ölkiliridiki aliy mektep oqughuchilirini yaxshi xizmet we imtiyazlar bilen Uyghur élide yiltiz tartishqa jelp qiliwatqan bir mezgilde, ular yene Uyghur élide yéza-qishlaqlarda kishilerning "Ishik aldidila xizmetke orunlashturush" boyiche herxil kiyim-kéchek, toqumichiliq we qurashturush dégendek zawutlarda ishqa orunlashturuluwatqanliqini teshwiq qilmaqta. Biraq, bu xildiki "Ishik aldidila ishqa orunlashturush" siyasiti chet'ellerdiki közetküchiler teripidin asasen Uyghur qatarliq yerlik xelqlerning erzan emge küchi süpitide mejburiy emgekke tutulushi, dep bahalanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet