Xitay hökümiti "Bingtu'en" diki xitaylarni köp perzentlik bolushqa righbetlendürmekte

Muxbirimiz eziz
2018-07-19
Élxet
Pikir
Share
Print

Xitay hökümiti 2016-yili yéngi yildin bashlap, "Pilanliq tughut" ni bikar qilip, xitaylarning ikki perzentlik bolushigha ruxset qilghan idi.

Nöwette Uyghurlar diyaridiki ishlepchiqirish-qurulush armiyesi, yeni "Bingtu'en" de her derijilik hökümet tarmaqliri bingtu'enlerdiki xitay puqralirini mezkur siyasetni pa'al ijra qilishqa righbetlendürmekte iken.

Xitay hökümiti bashqurushidiki "Yer shari waqti" gézitining 18-iyuldiki xewirige qarighanda, Uyghurlar diyaridiki "Bingtu'en" sistémisida wekillik nuqta bolghan shixenze shehiridiki hökümet tarmaqliri yéngidin belgilime élan qilip, ikkinchi perzentlik bolghan anilargha bérilidighan dem élishni 128 kün'ge uzartish, shuningdek maddiy jehettin mukapatlashni yolgha qoyghan.

Alaqidar matériyallarda körsitilishiche, Uyghurlar diyaridiki xitay nopusi san jehette alliqachan Uyghurlarning nopusidin éship ketken iken, yene kélip bu nopus qurulmisida "Bingtu'enler" diki xitay nopusi muhim salmaqni teshkil qilidiken. Xewerlerdin xitay da'irilirining "Bingtu'en" ni téximu kücheytiwatqanliqi, uni Uyghurlar zich olturaqlashqan jenubiy rayonlarda kéngeytiwatqanliqi we nopusini ashuruwatqanliqi melum bolmaqta.

Axbarat xewerliri bolsa nöwette bir milyondin artuq Uyghurning türlük namlardiki yighiwélish lagérlirigha qamalghanliqini, bu Uyghurlarning mutleq köp qismining yash we ottura yashliq Uyghur erliri ikenlikini körsetmekte.
Uyghurlar diyari heqqide türlük tetqiqatlar bilen meshghul boluwatqan mutexessisler uzundin buyan xitay hökümitining Uyghurlar diyarigha ichkiri ölkilerdin milyonlap nopus köchürüsh, shu arqiliq bu jaydiki xitay nopusining sanini ashurup özlirining mutleq hökümranliqini mustehkemlesh charisini qollinip kéliwatqanliqini qeyt qilip kelgen idi.

D u q ning bayanatchisi dilshat rishit xitay hökümitining nöwette Uyghurlar diyarigha makanlishiwalghan xitay a'ililirini ikkinchi perzentlik bolushqa righbetlendürüshi heqqide pikir qilip: "Xitay hökümiti nechche yüz ming qawul Uyghur erlirini lagérlargha qamash arqiliq Uyghurlarning normal köpiyishini cheklimekte. Emma ularning hazir bingtu'enlerdiki xitaylarni köp perzentlik bolushqa righbetlendürüshi emeliyette mushu arqiliq shu jaylarda tughulghan xitay nopusining sanini ashurush hemde shu arqiliq Uyghurlarni téximu qattiq kontrol qilishni meqset qilghan" dédi.

Toluq bet