Уйғур елидики биңтуәнниң сәһийә хадимлириниң санини изчил көпәйтиватқанлиқи диққәт қозғиди

Мухбиримиз ирадә
2020-08-20
Share

Хитайниң уйғур елидә турушлуқ ишләпчиқириш-қурулуш армийисиниң күндилик гезити 20-авғуст тарқатқан бир хәвиридә уйғур елидә турушлуқ биңтуәндә һазир 9943 нәпәр дохтур барлиқи вә һәр 1000 адәмгә 3 нәпәрдин кәспий дохтур тоғра келидиғанлиқини хәвәр қилған.

Хәвәрдин қариғанда, биңтуән һазир болупму уйғур елиниң җәнубиға җайлашқан дивизийәлиридә дохтурхана қурулуши вә сәһийә хадимлирини толуқлаш хизмитини алаһидә күчәйтиватқан болуп, улар хәвәрдә җәнубтики дивизийәләргә тәвә дохтурханиларниң давалаш сүпитиниң өстүрүлгәнлики, мулазимәт иқтидари вә һәрхил дәриҗидики оператсийәләрни қилиш иқтидариниң өстүрүлгәнликини алаһидә тәкитлигән.

Хитай даирилириниң биңтуәнниң сәһийә хизмәтлиридики тәрәққиятни тәкитлишиниң сәвәби ениқ әмәс. Бирақ бу хәвәрниң уйғур елидә таҗсиман вирус юқуминиң контрол астиға елинғанлиқи тәшвиқ қилиниватқан мәзгилдә чиқирилиши диққәт қозғайдикән.

Бундин башқа йәнә бүгүн байинғолин областлиқ һөкүмәт гезити елан қилған бир хәвәрдин қариғанда, бу йил байинғолин областилиқ сәһийә мәктипи уйғур ели миқясидин 2200 нәпәр оқуғучи қобул қилишни пиланлаватқан болуп, бу оқуғучилар сестра, туғут аниси, доригәрлик, йеза тебабити, давалаш тәҗрибиханиси техникиси, хитай тебабити вә саламәтликни әслигә кәлтүрүш қатарлиқ кәсипләр бойичә қобул қилинидикән.

Чәтәлләрдики көзәткүчиләр биңтуәнниң сәһийә саһәси бойичә елип бериватқан бу тәйярлиқлириниң бир тәрәптин таҗиисман вирус юқумиға охшаш җиддий характерлик юқумлуқ кесәлликләрниң алдини елиш үчүн болса, йәнә бир тәрәптин хитайниң голмуд-корла төмүрйолини туташтуруп, корла тәвәси вә җәнубтики вилайәт-областларға зор түркүмдә хитай көчмәнлирини йөткәп олтурақлаштурушни пиланлаватқанлиқиниң бешарити икәнликини көрсәтмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт