Uyghur élidiki bingtu'enning sehiye xadimlirining sanini izchil köpeytiwatqanliqi diqqet qozghidi

Muxbirimiz irade
2020-08-20
Élxet
Pikir
Share
Print

Xitayning Uyghur élide turushluq ishlepchiqirish-qurulush armiyisining kündilik géziti 20-awghust tarqatqan bir xewiride Uyghur élide turushluq bingtu'ende hazir 9943 neper doxtur barliqi we her 1000 ademge 3 neperdin kespiy doxtur toghra kélidighanliqini xewer qilghan.

Xewerdin qarighanda, bingtu'en hazir bolupmu Uyghur élining jenubigha jaylashqan diwiziyeliride doxturxana qurulushi we sehiye xadimlirini toluqlash xizmitini alahide kücheytiwatqan bolup, ular xewerde jenubtiki diwiziyelerge tewe doxturxanilarning dawalash süpitining östürülgenliki, mulazimet iqtidari we herxil derijidiki opératsiyelerni qilish iqtidarining östürülgenlikini alahide tekitligen.

Xitay da'irilirining bingtu'enning sehiye xizmetliridiki tereqqiyatni tekitlishining sewebi éniq emes. Biraq bu xewerning Uyghur élide tajsiman wirus yuqumining kontrol astigha élin'ghanliqi teshwiq qiliniwatqan mezgilde chiqirilishi diqqet qozghaydiken.

Bundin bashqa yene bügün bayin'gholin oblastliq hökümet géziti élan qilghan bir xewerdin qarighanda, bu yil bayin'gholin oblastiliq sehiye mektipi Uyghur éli miqyasidin 2200 neper oqughuchi qobul qilishni pilanlawatqan bolup, bu oqughuchilar séstra, tughut anisi, dorigerlik, yéza tébabiti, dawalash tejribixanisi téxnikisi, xitay tébabiti we salametlikni eslige keltürüsh qatarliq kesipler boyiche qobul qilinidiken.

Chet'ellerdiki közetküchiler bingtu'enning sehiye sahesi boyiche élip bériwatqan bu teyyarliqlirining bir tereptin taji'isman wirus yuqumigha oxshash jiddiy xaraktérlik yuqumluq késelliklerning aldini élish üchün bolsa, yene bir tereptin xitayning golmud-korla tömüryolini tutashturup, korla tewesi we jenubtiki wilayet-oblastlargha zor türkümde xitay köchmenlirini yötkep olturaqlashturushni pilanlawatqanliqining béshariti ikenlikini körsetmekte.

Toluq bet