Уйғур дияридики хитай оқутқучилар уйғур оқуғучиларниң өйлиридә чаған өткүзүшкә уюштурулған

Мухбиримиз әркин
2018-02-16
Елхәт
Пикир
Share
Принт

Хитай һөкүмити чаған байримида һәр хил усулларни ишқа селип, уйғурларни чаған байрими өткүзүшкә қистиған.

Хитай ахбарат васитилириниң ашкарилишичә, даириләр бу йиллиқ чағанда хитай оқутқучиларни сәпәрвәр қилған. Уларни уйғур оқуғучилириниң аилилиригә берип, чағанни оқуғучиларниң аилилиридә биллә өткүзүшкә тәшкиллигән. Турпан райониниң өзидә 10 миң оқутқучи йеза-кәнтләргә чүшүп, чағанниң һарпа кечисини уйғур оқуғучилириниң аилилиридә өткүзүшкә орунлаштурулған.

Уйғур аптоном районлуқ партком бу йилниң башлирида уқтуруш чиқип, чағанни һәммә милләтниң тәң өткүзүши төвәнгә чүшкән һәр қайси хизмәт гуруппилириниң әң асаслиқ сиясий вәзиписи икәнлики вә буниң бир муқимлиқ тәдбири икәнликини елан қилған. Бирақ чәтәлдики уйғур паалийәтчиләр мусулман уйғурларни мәҗбурий чаған өткүзүшкә орунлаштурушни тәнқидләп, буниң «мәдәнийәт зораванлиқи» вә «мәҗбурий ассимилятсийә» сиясити икәнлики шундақла бу уйғурларниң өрп-адәтлиригә қилинған еғир һөрмәтсизлик икәнликини тәкитлигән иди.

Үрүмчидә чиқидиған «мәркизи шәһәр истемалчилар әтигәнлик гезити» ниң хәвиридә көрситилишичә, турпанда уйғур оқуғучиларниң аилисигә берип чаған өткүзүшкә орунлаштурулған бир хитай оқутқучи өзиниң биринчи қетим бир аз санлиқ милләтниң өйидә чаған байрими өткүзгәнликини билдүргән. У, «биз мәснәвиләрни биргә чаплидуқ, биргә түгрә түгдуқ, тамақларға биргә һәмдастихан болдуқ, өз ара алақә, алмаштуруш арқилиқ бир-биримизгә болған чүшәнчимиз ашти. Һессиятимиз чоңқурлашти,» дегән.

Хитай һөкүмитиниң хитай пуқралирини пиланлиқ уйғур аилиләрдә чаған өткүзүшкә орунлаштуруши уйғур елиниң башқа җайлиридиму йүз бәргән. Уйғур аптоном районлуқ парткомниң зувани болған «шинҗаң гезити» ниң хәвәр қилишичә, аптоном районлуқ сиясий-қанун комитетиниң секретари җу хәйлүн чағанни хотән наһийәсиниң бағчи базириға қарашлиқ юқириқи бағ кәнтидики бир уйғур аилисидә өткүзгән.

Пикирләр (0)
Share
Толуқ бәт