Чағанда ақсу шәһиридә 28 миңдин артуқ панус есилған

Хитайниң бу йилқи чаған байрими пүтүн уйғур дияридиму омумйүзлүк панус есиш, мәснәвиләр вә лозункилар есиш һәм башқа типик хитай миллий мәдәнийәт әнәниси вә вәтәнпәрвәрликни әкс әттүридиған мурасимлар билән өткүзүлмәктә.

Хитай һөкүмәт мәтбуатлиридики сүрәтлик учурлардин мәлум болушичә, миң йиллардин буян ислам диниға етиқад қилип, өз миллий мәдәнийәт әнәнисигә игә болуп кәлгән уйғурлар, шәһәрләрдин тартип йеза-қишлақларғичә чаған өткүзүшкә тәшкилләнгән. Чаған мәзгилидә бәзи җайларда уйғур өсмүрлириниң хитайчә кийиндүрүлүп, паалийәтләргә қатнаштурулған, көплигән уйғур деһқанлириниң өйлиригә, һойлилириға вә ишик алдилириға панус һәм хитайчә мәснәвиләрни асқан мәнзирә шәкилләндүрүлгән. 

Чағанлиқ безәш ишлириға йәрлик һөкүмәтләр зор мәбләғ вә күч аҗратқан болуп, ақсу ахбарат торидики учурда қәйт қилинишичә, ақсу шәһәрлик парткомниң бир туташ тәшкиллиши билән ақсу шәһири омумйүзлүк чағанлиқ кәйпиятиға киргүзүлүп, ақсу шәһиридики барлиқ чоң-кичик коча вә җамаәт орунлириға 28 миң640 данә панус есилған, 1781 мәснәви чапланған вә 1824 тәшвиқат доскиси ишләнгән, 288 һәр хил чирағ вә башқа хитай миллий әнәнисини әкс әттүридиған чағанлиқ буюмлар есилған. Буниңдин башқа йәнә кочиларға 220 хитай дөләт байриқи есилған икән. 

Радийомиз зияритини қобул қилған түркийәдики һаҗитәппә университетиниң дотсенти әркин әкрәмниң ейтишичә, хитай һөкүмитиниң бу қиливатқини хитайниң чаған байрими әнәнисини уйғурларға мәҗбурий теңиштин ибарәттур. Униң әскәртишичә, буниң әксичә даириләр уйғурларниң миң йиллардин буян етиқад қилип келиватқан ислам дининиң рамзан вә қурбан һейт-байрамлиридики дини вә миллий әнәнилиригә тосқунлуқ қиливатқан болуп, рамзан мәзгилидә уйғурларниң роза тутуши қаттиқ назарәт астиға елинған вә чәкләнгән иди.