Ili oblasti kochigha chiqish cheklimisini yene 15 kün uzartqan

Muxbirimiz erkin
2020-02-17
Élxet
Pikir
Share
Print

Uyghur aptonom rayonidiki "Wuxen wirusi" eng köp tarqalghan jay-ili oblastida da'iriler puqralarning kochigha chiqishi we aptomobil qatnishini yene 15 kün uzartqan.

Melum bolushiche, nöwette xitayning ghuljidiki bingtu'en 4‏-déwiziyesini öz ichige alghan ili oblastidiki yuqumdarlar Uyghur aptonom rayoni miqyasidiki omumi yuqumdarlarning 3 tin bir qismidin éship ketken.

Uyghur aptonom rayonluq sehiye we salametlik komitéti düshenbe küni pütün rayon miqyasidiki yuqumdarlarning 16‏-féwral küni 75 ke yetkenlikini bildürgen. Mezkur orunning ashkarilishiche, yuqumdarlarning 28 nepiri ili oblastida, 23 nepiri ürümchide, qalghanliri bortala, sanji, aqsu, turpan qatarliq jaylarda bayqalghan iken. Shu munasiwet bilen ili oblastliq partkom 14‏-féwral küni yighin chaqirip, ilida puqralarning kochigha chiqishi we aptomobil qatnishini yene 15 kün uzartishni, xilapliq qilghuchilarni qattiq jawabkarliqqa tartishni qarar qilghan.

Ili oblastliq partkomning mikru bilogida élan qilin'ghan 4 maddiliq qararda herqaysi idare-jem'iyetlerning ishikni ching étip, kishilerni yaxshi bashqurushi, ijtima'iy rayon xadimlirining orunlashturushigha emel qilishi telep qilin'ghan.

Yerlik da'iriler wirusning mezkur rayonda téximu yamrap kétishining aldini élishqa tirishiwatqanliqini bildürsimu, lékin chet'eldiki Uyghurlar bu xil qamalning keng kölemlik acharchiliq keltürüp chiqirishidin we wirusning lagérlargha tarqilishidin qattiq endishe qilmaqta shundaqla dunya sehiye teshkilatini rayonda tekshürüsh élip bérishqa chaqirmaqta.

Uyghur aptonom rayonluq sehiye-salametlik komitétining élan qilishiche, 16‏-féwral küni rayonda yéngidin yene 4 yuqumdar bayqilip, yuqumdarlarning omumi sani 75 ke yétip barghan. Mezkur organ17‏-féwral élan qilghan uqturushida buning ichidiki ili oblastida bayqalghan 28 yuqumdarning 18 nepirining yerlikte, 10 nepirining ghuljadiki bingtu'en 4‏-déwiziyeside ikenlikini bildürgen.

Toluq bet