Bu yil Uyghur élidiki kona mehellilerni chéqish qurulushida 900 ming ahale köchürülgen

Muxbirimiz erkin
2017-11-10
Share

Xitay da'iriliri bu yil zor miqdarda meblegh ajritip, Uyghur aptonom rayonining ürümchi qatarliq sheherliride Uyghurlar topliship olturaqlashqan kona mehellilerni chéqish qurulushini tézletken. Xitay axbarat wasitilirining xewer qilishiche, bu yil Uyghur élining her qaysi sheherliridiki kona sheher rayonlirida olturushluq ottura we töwen kirimlik 900 ming ahale köchürülüp, 360 ming yürüsh öy özgertilgen.

Ürümchi shehirining kona sheher rayonlirini chéqish qurulushi bu yil 4‏-ayda bashlan'ghan. Da'iriler ürümchi shehirining özide tengritagh, saybagh qatarliq 6 rayonidiki kona mehellilerni chéqilidighanliqini, chéqilidighan rayonlarning omumiy kölimining 173 kwadrat kilométirgha yétidighanliqini bildürgen. Da'iriler bu yil 6‏-aprél küni ürümchi döngköwrüktiki chong bazarning aldida kona öylerni chéqish murasimi ötküzgen idi.

Da'iriler ilgiri Uyghur aptonom rayonidiki yerlik axbarat wasitilirige bergen bayanatlirida, kona sheher rayonlirini chéqip özgertish qurushining "Jem'iyet muqimliqi we uzaq mezgillik eminlikni emelge ashurush bash nishani üchün qilin'ghan chong istratégiyilik orunlashturush" ikenlikini ilgiri sürgen idi.

Xitay da'irilirining kona sheher rayonlirini chéqip özgertish qurulushini siyasiy istratégiyege baghlap chüshendürüshi Uyghur teshkilatlirining diqqitini qozghidi. Ular, xitayning mezkur pilani bu rayonlardiki topliship yashaydighan Uyghurlarni tarqaqlashturushni meqset qilidighanliqini, buning yerlik Uyghurlarning tirikchilik yolini tosup, qedimiy sheherning tarixini weyran qilidighanliqini ilgiri sürgen idi. Uyghur aptonom rayonluq hökümet bu yil 6‏-ayda "Kona mehelle, bazarlarni chéqip özgertish xizmiti toghrisida uqturush" chüshürüp, her qaysi jaylarning chéqip özgertish qurulushini 2020‏-yildin burun orunlap bolushni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet