Рамизан айида хитай тәшвиқатлири "диний етиқад әркинлики" тәшвиқатиға киришип кәткән

Мухбиримиз җәвлан
2021-04-20
Share

Хитай таратқулириниң хәвиригә қариғанда, 18-апрел уйғур аптоном районлуқ һөкүмәт үрүмчидә "шинҗаң мәсилилиригә даир ахибарат елан қилиш йиғини" ечип, уйғур райониниң һәр қайси җайлиридики "рамизанлиқ әһвал" ни тонуштурған. Йиғинда һәр қайси вилайәт, шәһәрләрдики диний затлар вә етиқадчи амма интернет арқилиқ улинип, рамизан күнлиридики "һәқиқий әһвал" ни баян қилған.

Бу хәвәрдә хитайниң хәлқара бесимға қарши тәшвиқат йүргүзүватқанлиқи рошән көрүлгән болуп, чәт әл таратқулириниң уйғур районидики мусулманларниң диний етиқадиниң чәклиниши, молла-өлималириниң тутқун қилинишиға даир ахбарат темилири қаттиқ тәнқидләнгән һәмдә тутқун қилинған затларниң "диний затлар әмәс, бәлки ислам байриқини көтүрүвелип бөлгүнчилик, террорлуқ билән шуғулланған азғун җинайәтчиләр икәнлики, хитайниң қанун дөлити икәнлики, бундақ җинайәтчиләргә қаттиқ зәрбә беридиғанлиқи" дегәндәк кона сәпсәтилири күчәп базарға селинған.

Көзәтчиләрниң қаришичә, хитайниң бу айда ахбарат елан қилиш йиғини ечип, диний затлар билән етиқадчи аммини оттуриға чиқирип сөзлитиши йәнила өз җинайитини йошуруш вә хәлқара җамаәт бесимға тақабил туруш үчүндур. Хитайниң уйғурларниң диний етиқадини йоқитишқа өткәнлики, өлималирини тутуп, мәсчитлирини чеқип, қуранлирини көйдүргәнлики вә авамни өз динидин тамамән йирақлаштурувәткәнлики ениқ. Әмма хитай бу қабаһәтни көрмигән яки көрүшни халимайдиғанларниң дуняда йәнила көп санлиқ икәнликини яхши билгәчкә, бу тәшвиқатини һармай-талмай елип бармақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт