Qorghas chilpengzidiki bir xitay a'ile xristi'an chérkawi qorghas nahiyelik saqchi idarisi üstidin sotqa erz qilghan

Muxbirimiz erkin
2015-05-29
Share

Uyghur élining qazaqistan chégrasidiki qorghas nahiyesige qarashliq chilpengze baziridiki bir xitay a'ile xristi'an chérkawi, qorghas nahiyelik j x idarisi üstidin yerlik sot mehkimisige erz qilghan.

Erzdarlar chilpengze saqchi ponkitining bu yil 4‏-ayda mezkur a'ile chérkawining ezalirini qanunsiz diniy pa'aliyet bilen shughullan'ghan, dep tutqun qilip, ulargha memuri jaza bergenliki we jerimane qoyghanliqigha naraziliq bildürgen.

Nöwette, xitay edliye tarmaqliri Uyghurlarning diniy pa'aliyitini radikalliqqa baghlap qattiq basturuwatqan bolsimu, biraq yerlik sot yuqiriqi a'ile xristi'an chérkawining erzini qobul qilghan.

Amérikining téksas shtatidiki"Junggo yardem jem'iyiti" namliq xristi'an diniy teshkilatining ashkarilishiche, mehkime 6‏-ayning 3‏-küni sot échip, dawagerlerning erzini körüp chiqidiken. Dewagerler saqchilar bergen memuri jazani bikar qilishni telep qilghan.

Közetküchilerning ilgiri sürüshiche, sotning erzni yolluq dep qarap, saqchilarni xatagha chiqirish éhtimali yoq bolsimu, biraq da'iriler Uyghur musulmanlirining pa'aliyitini diniy ashqunluq, dep qattiq basturuwatqan mezgilde, sotning xristi'an a'ile chérkawi sun'ghan erzni qobul qilishi yéngiliqken.

Kishilik hoquq pa'aliyetchilirining körsitishiche, xitay Uyghur élida a'ile xristi'an chérkawlirining pa'aliyitini cheklisimu, biraq u, musulmanlargha qoral ishletkendek ulargha qoral ishletmeydu. Ulargha jerimane qoyush, yighilish ötküzse tarqitiwétish, bezide waqitliq tutup turup qoyup bérishtek nisbeten yénik charilerni körmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet