Xitay hökümiti Uyghur diyarida “Islam dinini xitaychilashturush” toghriliq yene jar sélishqa bashlighan

Xitay hökümet taratqulirining xewer bérishiche, 6-ayning 22-künidin 23-künigiche Uyghur aptonom rayonluq partkom nezeriye öginish merkizi chén chüen'goning riyasetchilikide kolléktip muhakime yighini ötküzgen.

Yighinda xitay re'isi shi jinpingning partiye tarixi we xitay tarixi toghrisidiki yolyoruqlirini öginish we izchillashturush muhakime qilin'ghan. Mezkur yighin'gha riyasetchilik qilghan Uyghur aptonom rayonluq partkomning sékrétari chén chüen'go xitay re'isi shi jinpingning yolyoruqlirini muressesiz ijra qilish, Uyghur rayonidiki barliq kadirlar we ammining siyasiy idiye jehette xitay kompartiyesi merkiziy komitéti bilen birdeklikni saqlishini telep qilghan.

Diqqet qozghaydighini shuki, mezkur yighinda “Jungxu'a milletliri ortaq éngini berpa qilish, shinjangdiki islam dinini xitaychilashturush we uni sotsiyalizm üchün xizmet qildurush” sho'ari yene otturigha qoyulghan.

Chén chüen'goning bu sözliri chet'ellerdiki közetküchiler we Uyghur siyasiy pa'aliyetchilirining küchlük inkasini qozghidi. Ular, xitay hökümitining Uyghur rayonida “Islam dinini xitaychilashturush” siyasitini yolgha qoyushi, yalghuzla rayondiki Uyghur qatarliq musulman xelqlerning diniy étiqadigha qilin'ghan ziyankeshlik bolmastin, belki islam dinining tüp prinsiplirigha we pütün dunyadiki bir milyardtin artuq musulmanlarning dini héssiyatigha qilin'ghan haqaret ikenlikini eskertip ötti.

Xitay hökümitining Uyghur rayonida yürgüzüwatqan irqiy we medeniyet qirghinchiliqliri xelq'ara metbu'atlarningmu diqqitini qozghap kelmekte. 2019-Yili 16-noyabir küni “Nyu-york waqit géziti” xitay re'isi shi jinpingning “Qet'iy rehim qilmasliq” buyruqini ashkarilighan bolup, shuningdin kéyin xelq'ara jama'et xitayning Uyghurlargha yürgüzüwatqan zulumlirining biwasite shi jinpngning buyruqi bilen bolghanliqini. Tonup yetken idi.

Amérika diniy étiqad erkinliki komitétining bu yilliq doklatidimu xitayning Uyghur qatarliq musulmanlarni diniy étiqadidin waz kéchishke mejburlawatqanliqi tilgha élin'ghan idi.