“Dunya diniy xewerler” tori xitayning Uyghur rayonidiki diniy siyasitini tenqid qildi

Muxbirimiz erkin
2017.10.02

“Dunya diniy xewerler” namliq xelq'ara diniy erkinlik tori xitayning Uyghur rayonidiki diniy siyasitini tenqid qildi.

Mezkur torning düshenbe küni élan qilghan maqaliside, xitayning Uyghur rayonida yéngi nishan we taktikilarni keship qilip, diniy erkinlikke hujum qiliwatqanliqi, uning Uyghur rayonidiki musulmanlarni jaynamaz we diniy simwolluq tüsidiki buyumni tapshurushqa buyrup, tapshurmighanlar “Qattiq jazalinidu” dep agahlandurghanliqini tekitligen.

“Xitayning siz bilishke tégishlik yéngi diniy kemsitishi” serlewhilik maqalida qeyt qilinishiche, uning yuqiriqi herikiti bu rayondiki köp sanliqni igileydighan musulman Uyghur millitige qarshi élip bériwatqan diniy kemsitishning dawamiken.

Maqalida yene, ularning binormal saqal qoyushi, balilargha köp uchraydighan musulman isimlirini qoyushi, dukanlarning halal belgisi bar buyumlarni sétishi cheklinip, tamaka, haraq sétishqa mejburlan'ghanliqi, meschitlerde “Allahu ekber”, dégen sözning “Ana weten ulugh” dégen sözge özgertilgenliki tekitlen'gen.

Maqalida körsitilishiche, xitay hökümiti bilen Uyghurlar otturisidiki hazirqi düshmenlikning sewebi bu rayonning iqtisadi tereqqiyatigha baghlinishliqken.

Maqalida, “Diniy kemsitishke qarshi ghezep we musteqilliq telipi izchil mewjut bolup kelgen uzun yilliq hadise bolsimu, biraq hazir mezkur rayonning 40% nopusini teshkil qilidighan xitaylarning kontrolluqidiki iqtisadi pilan bu ixtilapni kücheytti. Bu ehwal keltürüp chiqarghan zorawan heriketler we naraziliq xitayning herbiy basturushini peyda qildi” déyilgen.

Biraq xitay hökümiti rayondiki toqunushlarni uning siyasiti keltürüp chiqiriwatqanliqini ret qilip, buning sewebini “3 Xil küchler” we xelq'ara “Térrorluq guruhliri” gha artip kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.