Xitay uniwérsitéti Uyghur oqughuchilargha diniy étiqadning aldini élish wedinamisi imzalatqan

Muxbirimiz erkin
2018.10.22

Xitayning enxuy ölkisidiki “Junggo pen-téxnika uniwérsitéti” 17‏-öktebir Uyghur oqughuchilirigha birdek diniy étiqadning aldini élish wede we mes'uliyetnamisi imzalatqan.

Wede we mes'uliyetnamide din'gha étiqad qilmasliq, diniy pa'aliyet bilen shughullanmasliq, diniy kiyim kiymeslik, diniy buyumlarni saqlimasliq, bashqilarning yuqiriqidek ish heriketlerde bolushi, din tarqitishi yaki diniy yüzlinishlerde bolushigha yol qoymasliq telep qilin'ghan.

“Junggo pen-téxnika uniwérsitéti” ning bu herikiti Uyghur aptonom rayonida diniy étiqad omumyüzlük cheklinip, buninggha xilapliq qilghan musulmanlar qamaqqa yaki yighiwélish lagérlirigha qamiliwatqan mezgilge toghra keldi.

Kishilik hoquq teshkilatlirining ilgiri sürüshiche, nöwette az dégende bir milyondek Uyghur yighiwélish lagérlirida tutup turulmaqta iken. Yuqiriqi wediname we mes'uliyetname “Junggo pen-téxnika uniwérsitétining 2018-2019‏-yilliq küz pesillik oqush mewsumidiki shinjang siniplirining yighini” da imzalan'ghan.

Yighinda aptonom rayonluq ma'arip nazaritining mezkur uniwérsitétta turushluq nazaretchi oqutquchisi jang xeyyen söz qilip, Uyghur oqughuchilardin aptonom rayonluq partkomning “Ikkige yol qoymasliq”, “Altini cheklesh” toghrisidiki telipige qet'iy emel qilishni telep qilghan.

Uyghur aptonom rayonluq partkomning 2016‏-yili 11‏-ayda otturigha qoyulghan “Ikkige yol qoymasliq”, “Altini cheklesh” toghrisidiki uqturushida, aliy mektep oqughuchilirining din'gha étiqad qilishi, diniy pa'aliyetlerde bolushi birdek cheklen'gen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.