Һиндистанниң «иқтисад вақти гезити» уйғур имамлириниң хитайниң зәрбә бериш нишаниға айланғанлиқини хәвәр қилди

Мухбиримиз ирадә
2020-11-26
Share

Һиндистанда нәширдин чиқидиған «иқтисад вақти гезити» уйғурлар учраватқан дини зиянкәшлик һәққидә хәвәр тарқитип, «бейҗиң һөкүмити нәччә йүзлигән уйғур имамлирини тутқун қилип лагерға қамиди,» дәп язған. Мәзкур хәвәрдә норвигийәдә турушлуқ уйғур зиялийси абдувәли аюп вә әнгийәлик тәтқиқатчи рәчил һаррсниң йеқинда хәлқара мусапирлар тори уюштурған йиғинда қилған сөзлиридин нәқилләр кәлтүрүлгән.

Абдувәли аюп йиғинда «районда нәччә йүзлигән имам тутуп кетилди, һазир уларниң ахирәтлик ишлирини бир тәрәп қилидиған адәм болмиғачқа, уйғурлар өлүштинму қорқидиған болуп қалди,» дегән.

Хәвәрдә абдувели аюпниң 2018-йили 5-айдин бери елип бериватқан тәкшүрүши бойичә һазирға қәдәр аз дегәндә 613 имамниң җаза лагерлирида икәнликиниң дәлилләнгәнлики, хитайниң асаслиқ дүшминигә айланғанларниңму диний затлар икәнлики баян қилинған.

Хәвәрдә ейтилишичә, лондон унверситити шәрқ вә африқа тәтқиқат мәркизи (SOAS) ниң етно-музика илми профессори рачил харрис болса әр имамларниң хитай һөкүмити тәрипидин нишанға елинған уйғур җәмийитидики бирдин-бир диний затлар әмәсликини билдүргән. У уйғур аял диний затлириниңму җәмийәттә интайин муһим орни барлиқини, уларниң аялларниң дәпнә ишлириға мәсул болидиғанлиқи, балиларға қуран тилавәт қилишни өгитидиғанлиқи, шундақла җәмийәттә талаш-тартишларни мурәссә қилиш, мәслиһәт бериш, һәр хил мурасимларни өткүзүштәк муһим роллири барлиқини әскәртип, аял диний затларниңму охшашла хитайниң зәрбә бериш нишаниға айланғанлиқини билдүргән.

Һиндистанниң «иқтисад вақти гезити» өз хәвиридә бейҗиң һөкүмити җаза лагерлирини кишиләр өз ихтиярлиқи билән баридиған ‹кәспий тәрбийәләш мәркизи' дәп атисиму, бирақ ашкариланған пакитлардин бу орунларда уйғурларниң өз ирадисигә хилап һалда тутқун қилинғанлиқини вә у йәрдә инсан қелипидин чиққан муамилә, қейин-қистақ вә сиясий тәрбийәләшкә учраватқанлиқини қәйт қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт