Американиң хәлқара диний ишлар баш әлчиси: “уйғур балилириға немә үчүн муһәммәт, дәп исим қоюшқа болмайду”

Мухбиримиз әркин
2019.03.09

Америка ташқи ишлар министирлиқиниң хәлқара диний ишлар баш әлчиси сам бровенбәк хоңкоңда нутуқ сөзләп, хитайниң уйғурларни бастуруватқанлиқини тәнқидлигән. Униң илгири сүрүшичә, нөвәттә хитай компартийиси диний етиқадқа қарши уруш қиливатқан болуп, униң сиясити ашқунлуқ күчәйтиши мумкин икән. У бу сөзләрни 8‏-март күни хоңкоң чәтәллик мухбирлар кулубида нутуқ сөзлигәндә қилған.

Америка симлиқ хәвәрләр тори с н н ниң хәвәр қилишичә, у хитайда католиклар, мусулманлар, тибәтлик буддистларға қарита кәмситишниң күчәйгәнликини әскәртип, “хитай компартийиси диндар кишиләрдин қорқамду? у немә үчүн инҗилға баш қойған хәлқигә ишәнмәйду? уйғур балилириға немә үчүн муһәммәт, дәп исим қоюшқа болмайду? немә үчүн тибәтләрниң миң йилдин бери давамлаштуруп кәлгән өзиниң диний рәһбәрлирини өзи сайлишиға һөрмәт қилмайду?” дәп соал қойған. С н н телевизийәсиниң тәкитлишичә, сам бровенбәкниң сөзи бейҗиңниң бир милйондин артуқ мусулман уйғурни йиғивелиш лагерлириға қамиши кәлтүрүп чиқарған хәлқара наразилиқни ипадилигән.

Бровенбәк сөзидә йәнә уйғурларниң диний етиқади сәвәблик халиғанчә тутқун қилинғанлиқини әскәртип, “биз бу лагерлар қандақ болса шундақ атишимиз керәк. Бу орунлар аз санлиқ милләтләрниң мәдәнийәт вә диний кимликини йоқитиш мәқситидә қурулған йиғивелиш лагерлиридур” дегән. Униң илгири сүрүшичә, бу лагерларда “тутқунлар җисманий вә роһий тән җазасиға, сиясий өзгәртишкә, мәҗбури әмгәккә селинмақта” икән. У, бу орунларниң хитай ейтқандәк ашқунлуқни түгәтмәйдиғанлиқи, бәлки униң ашқунлуқни “пәйда қиливатқанлиқи” ни тәкитлигән. Америка һөкүмитиниң илгири сүрүшичә, нөвәттә бу лагерларда 800 миңдин 2 милйонғичә уйғур, қазақ вә башқа мусулман аз санлиқ милләтләр тутуп турулмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.