“Asiya katolik xewerliri” xitaydiki az sanliq milletler DNA ambirining xewplik ikenlikini agahlandurdi
2018.03.23
“Asiya katolik xewerler” tor géziti xitay hökümitining az sanliq milletler DNA ambiri qurushining xewplik ikenlikini agahlandurdi.
Mezkur tor géziti jüme küni xitayning gherbiy -jenubiy ölkiliridiki az sanliq milletlerning DNA ambirini qurmaqchi boluwatqanliqini xewer bérip, néme üchün nuqtiliq halda az sanliq milletlerning DNA ambiri qurulidighanliqigha so'al qoyghan. “Yer shari waqti géziti” 19-mart bergen xewiride 3 xitay shirkitining yünnen qatarliq gherbiy-jenubiy ölkilerdiki 25 az sanliq milletning DNA ambirini qurushqa hemkarlishiwatqanliqini bildürgen idi.
“Asiya katolik xewerler” géziti ilgiri Uyghur aptonom rayonluq da'irilerning omumiy xelq salametlik tekshürüshini bahane qilip, 12 yashtin 60 yashqiche bolghan Uyghur musulmanlirining DNA ewrishkisini toplighanliqi, xitayning Uyghurlarning DNA ewrishkisi, barmaq izi, qan tipi we bashqa bi'ologiyelik uchurlirini toplishidiki meqsitining ularni téximu ünümlük kontrol qilish ikenlikini tekitligen.
Xewerde neqil keltürüshiche, amérika rand tetqiqat ornining xelq'ara mudapi'e ishliri boyiche yuqiri derijilik analizchisi tomoty xés “Xitayning az sanliq milletler DNA ambirini qurushi xewplik dep qarilishi kérek. Chünki uning suyi'istémal qilinish xewpi zor,” dégen. U yene “DNA Ambirining qurulushi az sanliq milletlerni kemsitish, keng kölemlik nazaret qilish, saqchilarning ularni basturush éhtimalliqini zoraytidu,” dégen. “Asiya katolik xewerler” torining körsitishiche, yünnende qurulidighan DNA ambiri yene az sanliq milletlerning tire we qan ewrishkilirinimu toplaydiken.