Уйғур елидә чаған мәзгилидә хитай пуқралар үчүн қулай шараит яритилмақчи

Мухбиримиз үмидвар
2018-01-28
Елхәт
Пикир
Share
Принт

Уйғур аптоном райони даирилири хитай миллитиниң әнәниви баһар байрими - чаған мәзгилидә һәр түрлүк бихәтәрлик тәдбирлирини күчәйтиш билән бир вақитта хитай пуқралириниң байрамлиқ сәпәр ишлириға алаһидә қулайлиқ шараит яритиватқанлиқи һәмдә бихәтәрлик тәкшүрүшни күчәйтиватқанлиқи инкас қилинмақта.

«Шинҗаң гезити» ниң хәвиридин ашкарилинишичә, 16-феврал күнидин башлап өткүзүлидиған чаған байримида зор сандики хитай аһалиси хитай ичкири өлкилиригә вә яки уйғур райони ичидә йөткилип, ата-ана, уруқ-туғқанлири билән җәм болидиған болуп, әнә шу паалийәтләр үчүн қулайлиқ шараит яритиш мәқситидә хитай шәһәрлиригә қатнайдиған пойиз қетим сани көпәйтилидикән, мәсилән, үрүмчидин шаңхәй вә чеңду линийәсидә биваситә қатнайдиған 16 пойиз көпәйтилидикән.

Қатнаш даирилири чаған мәзгилидики пойизлардики қатнаш саниниң төт милйон 4 йүз миң адәм қетимға йетишини мөлчәрлигән. 

Буниң биләнла қалмастин йәнә хитай авиатсийә даирилири уйғур райони ичи вә хитайниң бир қисим чоң шәһәрлири арисидики һава қатнишидики нөвәтчи айропилан санини көпәйтидикән вә йеңидин үрүмчи-нәнчуң-венҗу линийиси вә башқа биваситә линийәләрни ачидикән.

Хәвәрдин мәлум болушичә, чаған мәзгилидики бу хил қатнаш қолайлиқлириға мас һалда үрүмчи, ғулҗа, ақсу корла қатарлиқ шәһәрләрдики 7 чоң вогзалда 17 бихәтәрлик тәкшүрүш өткили қуридикән вә йәнә бир қисим вогзалларда йолучиларға қарита «йешил йол» тәсис қилинидикән. Даириләр буларниң һәммисини йолучилар үчүн қулайлиқ яритиш дәп атиған.

Әмма, хәлқара мәтбуат учурлирида ейтилишичә, хитай даирилири һазир уйғур райониниң һәммила йеридә, коча, җамаәт орунлири вә қатнаш орунлирида зор сандики камераларни орунлаштуруп, тәкшүрүш вә назарәтни күчәйтивәткән. Уйғур көзәткүчиләрниң инкас қилишичә, бу хил тәкшүрүш вә назарәт қилишниң асас нишанлири уйғур қатарлиқ милләтләр болмақта, айропорт, пойиз истансиси қатарлиқ җайлардики уйғурларға қаритилған бихәтәрлик тәкшүрүш хитайларға қариғанда алаһидә қаттиқлиқи билән пәрқлиқ болуп кәлмәктә икән.

Пикирләр (0)
Share
Толуқ бәт