Xitayning birlik sep bölümi Uyghur rayonida "Uzun muddetlik eminlik" berpa qilalamdu?

Muxbirimiz jewlan
2021-03-03
Share

"Shinjang géziti" torining xewirige qarighanda, Uyghur aptonom rayonluq birlik sep bölümi yéqinda birlik sep bölüm bashliqliri yighini chaqirip, "Shinjangda uzun muddetlik eminlikni ishqa ashurush üchün kishilerning qelbini birleshtürüsh we uyushush küchini ashurush" nishani belgilen'gen hemde birlik sep xizmitide qolgha keltürülgen netijiler asasida kelgüside yéngi weziyet yaritip, rayonning uzun muddetlik siyasiy we iqtisadiy muqimliqini qoghdash tekitlen'gen.

Bu yighin'gha aptonom rayonluq partkomning mu'awin sékritari, bingtu'enning siyasiy komissari wang jünjéng qatnashqan we "Yiraqni közligen siyasetler tüzüsh, muqimliqni közligen tedbirlerni yolgha qoyush, qozghitishqa bolidighan barliq aktip amillarni ishqa sélish, ittipaqlishishqa bolidighan küchlerning hemmisi bilen ittipaqlishish we shu arqiliq shinjangning uzun muddetlik eminlikini ishqa ashurush" heqqide yolyoruq bergen.

Analizchilarning qarishiche, xitay kompartiyesining birlik sep xizmiti din, millet we oxshimighan partiye-goruhlarni öz etrapigha toplap, ularni öz menpe'eti üchün xizmet qildurushni asas qilidu. Köp yillardin buyan birlik sep bölümliri xitayning ichki muqimliqini saqlashtin halqip, yumshaq küch wasitiliri arqiliq xitayning tesirini xelq'aragha kéngeytish üchün xizmet qildi. Shi jinping hoquq tutqandin kéyin bolsa ular kompartiyening téximu küchlük qoraligha aylandi. Amérika bashchiliqidiki gherb elliri buni tonup yétip, xitayning birlik sep bölümi we bingtu'en emeldarlirigha cheklime qoydi. Uyghur rayonidiki birlik sep orunliri ilgiri milliy, diniy mesililerni yumshaq wasitiler bilen hel qilip kelgen bolsa, emdilikte saxta niqabini yirtip tashlap, kompartiyening diktatorluq apparatining muhim wasitiliridin birige aylandi. Birlik sep bölümi xitay kompartiyesining yumshaq küchige wekillik qilsimu, emeliyette xitayning zorawanliq jinayitige shérik boluwatqan bir orundur. Xitay kompartiyesi shuni biliduki, Uyghur rayonidiki "Uzun muddetlik eminlik" hergiz birlik sep bölümining qandaqtur "Oxshimighan qelblerni birleshtürüsh" usuli bilen emes, xitayning qoralliq küchi we saqchiliri arqiliq ishqa ashidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet