Уйғур дияридики толуқ оттура мәктәп маарипи һәқсиз болмақчи

Мухбиримиз үмидвар
2017-11-19
Елхәт
Пикир
Share
Принт

Хитайниң «қош тиллиқ маарип» вә «дөләт тили» да оқутуш дегәндәк намлар астида уйғур тилидики миллий маарипни пәйдинпәй әмәлдин қалдуруватқанлиқи уйғурларниң қаттиқ наразилиқлирини қозғаватқан бир пәйттә уйғур аптоном райони маарип даирилири йеңи бир бәлгилимә, йәни «толуқ оттура мәктәпләрдә һәқсиз маарипни йолға қоюш» қарарини елан қилди.

Хитай һөкүмәт ахбарат васитилиридин мәлум болушичә, уйғур аптоном районлуқ маарип назарити 1-декабирдин етибарән пүтүн аптоном район даирисидики адәттики толуқ оттура мәктәп оқуғучилириға вә оттура дәриҗилик кәспий мәктәп оқуғучилири, йәни техник ишчилар мәктипиниң пүтүн күнлүк түзүмдики оқуғучилириға қарита һәқсиз маарип түзүми йолға қойидиғанлиқини елан қилди. Мәзкур һәқсиз оттура мәктәп маарипи бойичә оқуш пули, дәрслик материяллири пули вә мәктәп ятақханилирида йетиш һәққи кәчүрүм қилинидикән. 

Уйғур аптоном райони маарип даирилири өзлириниң мәзкур йеңи бәлгилимисини «хәлқ турмуши қурулушини илгири сүрүштики муһим тәдбири», дәп тәриплигән. 

«Шинҗаң гезити» ниң бу һәқтики учуридин мәлум болушичә, мәзкур һәқсиз толуқ оттура мәктәп маарипи бәлгилимисигә пүтүн уйғур ели миқясида йолға қоюлидиған болуп, буниңдин бәһримән болидиған 857 миңдин артуқ оқуғучи бар икән. 

Чәтәлдики бир уйғур маарип мәсилилири тәтқиқатчисиниң қаришичә, хитай даирилириниң илгири көп йиллар мабәйнидә уйғур тилини өз ичигә алған миллий маарипқа аҗратқан мәблиғигә қариғанда, йеқинқи бир қанчә йил ичидики, болупму, 13-бәш йиллиқ пилан җәрянидики қош тили намидики хитай тиллиқ маарипқа, йәни уйғур, қазақ қатарлиқ миллий тилларни мәктәпләрдә әмәлдин қалдуруп, маарипни пүтүнләй хитайчилаштурушқа салған мәблиғи көрүнәрлик дәриҗидә ешип кетидикән.

Пикирләр (0)
Share
Толуқ бәт