Хитай уйғур елида турушлуқ һәрбий қисимлириға йеңи башқурулидиған бомба, топ вә ракета җаһазлирини сәплигән

Мухбиримиз әркин
2022-01-19
Share

Хитай азадлиқ армийәсиниң уйғур елида турушлуқ қисимлириға илғар типлиқ йеңи һава мудапийә башқурулидиған бомба системиси, замбирәк вә ракета қоюп бериш җаһазлирини сәплигән.

Хитайниң бу һәрбий тәйярлиқиниң кимгә қаритилғанлиқи мәлум болмисиму, бирақ униң афғанистан вәзийити, һиндистан билән болған чегра ихтилапи вә йеқинда қазақистандики өзгиришләр билән бир вақитта йүз бериши, диққат қозғиди. Хитай “йәр шари вақти гезити” ниң ейтишичә, анализчиләр бу орунлаштурушни “мурәккәп вәзийәттә қисимларниң җиддий әһвалға тақабил туруш иқтидарини күчәйтиду” дегән.

Һалбуки, хәвәрдә бу қоралларниң қайсий қисимларға сәпләнгәнлики вә бу қисимларниң турушлуқ орни тилға елинмиған. Хәвәрдә пәқәт хитай хәлқ азадлиқ армийәсиниң шинҗаң һәрбий райони қоманданлиқ штабиға қарашлиқ бир полкиға йеқинда HQ-17A типлиқ һава мудапийә башқурулидиған бомба системиси, PCL-181 типлиқ аптоматик зәмберәк, PHL-11 типлиқ ракета қоюп бериш системисини өз ичигә алған қоралларниң сәпләп берилгәнлики тәкитләнгән. Хәвәрдә ейтилишичә, HQ-17A типлиқ йеңи һава мудапийә башқурулидиған бомба системиси тунҗи қетим хитайниң 2019-йили өткүзүлгән дөләт байримидики паратта көрситилгән икән.

Хитай тартқулири өткән йили 5-айда тунҗи қетим хитай азадлиқ армийәсиниң уйғур елида турушлуқ қисимлириниң қорал-ярақлирини кәң көләмдә йеңилашқа башлиғанлиқини хәвәр қилған. “йәр шари вақити гезити” шу қетимқи бир хәвиридә, хитайниң бу райондики қисимлириға броневик, аптоматик зәмберәк, көп хил ракета қоюп бериш системиси, аптоматик минамйот вә айропиланға қарши башқурулидиған бомба қатарлиқ көп хил йеңи қоралларниң сәпләп берилгәнликини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт