Уйғур елидики қисимдин чекингән һәрбийләрниң маканлишип қелишқа тәшәббус қилиниватқанлиқи айдиңлашмақта

Мухбиримиз ирадә
2019-08-06
Share

Хитай даирилириниң нөвәттә уйғур елиниң һәрқайси җайлирида һәрбий сәптин чекингәнләрни шу җайларда маканлишип қелишқа орунлаштуруватқанлиқи ашкариланмақта.

5-Авғуст күни, ақсу ахбарат торида һәрбий сәптин чекингәнләр хизмити һәққидә елан қилинған бир парчә хәвәр көзәткүчиләрниң диққитини қозғиди.

Хәвәрдә, 2018-йилидин буян, ақсу вилайитидики наһийә (шәһәр)ләрдә қисимдин чекингән һәрбийләр ишлири идарилири арқа-арқидин қурулғанлиқи, уйғур аптоном районлуқ һөкүмәтниң биртуташ орунлаштурушиға асасән қисимдин чекингән һәрбийләр мулазимәт мәркәзлири қурулуп, пәқәт йеза дәриҗилик мулазимәт мәркизидинла 1294 и қурулғанлиқи баян қилинған.

Дуня уйғур қурултийиниң баянатчиси дилшат ришитниң қаришичә, һәрбий сәптин чекингәнләргә мулазимәт қилиш понкитлириниң кәң көләмдә қурулуши әслидә уйғур елигә һәрқайси ичкири өлкиләрдин вәзипә өтәш үчүн кәлгән һәрбийләрниң вәзипә муддити тошқандин кейинму уйғур елидә қелип маканлишишиға кәң көләмдә орунлаштурулуватқанлиқидин дерәк беридикән. Әслидә ичкири хитай өлкилиридин һәрбий сәпкә қатнишип, уйғур елидики қисимларға кәлгәнләр һәрбий сәптин чекингәндин кейин өз өлкилири вә юртлириға қайтидикән.

Дилшат ришит буниң, хитай һөкүмитиниң уйғур елидә 2 милйон әтрапида уйғур вә қазақ қатарлиқ йәрлик хәлқләрни лагерларға қамиғандин кейин һәдәп уйғур елигә хитай көчмәнлирини йөткәшни күчәйтиш шундақла райондики контроллуқини улар арқилиқ капаләткә игә қилиш истратегийәсиниң бир қисми икәнликини илгири сүрди.

Нөвәттә уйғур елиниң һәрқайси наһийәлиридә тохтимай елан қилиниватқан сақчи, оқутқучи вә башқа хизмәтчи хадим қобул қилиш, болупму бу хизмәтчиләрни ичкири өлкиләрдин қобул қилиш еланлири күчлүк диққәт қозғаватқан мәсилиләрниң бири болуп қалди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт