Xotende ishchi-xizmetchilerge qurban héytliq sowghat tarqatqan ishchilar uyushmisi bashliqi jazalandi
2018.06.11
Xoten radiyo-téléwiziye uniwérsitéti ishchilar uyushmisining bashliqi 2017-yili mektepning oqutquchilirigha qurban héytliq sowghat tarqatqanliqi seweblik jazalan'ghan. Xitay axbarat wasitilirining ashkarilishiche, ishchilar uyushmisining mezkur bashliqigha partiye ichide qattiq agahlandurush jazasi bérilgen.
Uyghur aptonom rayonluq intizam tekshürüsh komitéti 11-iyun küni merkezning 8 türlük qa'idisige xilapliq qilghan 7 déloni élan qilghan. Uningda xoten radiyo téléwiziye uniwérsitéti ishchilar uyushmisining bashliqi ma méyxu'a mezkezning 8 türlük qa'idisige xilapliq qilghan 7 shexsning biri qatarida tilgha élin'ghan.
Qalghan 6 kishining 2 nepiri Uyghur 4 nepiri xitay bolup, ular asasen sowghat qobul qilish, hökümet aptomobilini shexsiy ishigha ishlitish, kadirlarni hökümet puligha sayahet qildurush, dégendek sewebler bilen eyiblen'gen.
Közetküchilerning ilgiri sürüshiche, ma méyxu'aning xitay hökümiti Uyghur rayonida herqandaq diniy pa'aliyet, diniy ibadet, diniy qiyapet we diniy keypiyatni cheklep, buninggha xilapliq qilghan Uyghurlarni yighiwélish lagérlirigha yaki türmilerge solawatqan mezgilde qurban héytliq sowghat tarqitishi da'irilerning nérwisigha tegken bolushi mumkin iken.
Xitay hökümitining Uyghur rayonidiki diniy basturushi amérika hökümiti we kishilik hoquq teshkilatlirining tenqidige uchrap kelgen. Amérikining alahide elchisi sam browénbek yéqinda Uyghur rayonining diniy erkinlik weziyitidin endishe qiliwatqanliqini bildürgen idi.
“Tengritagh tori” ning xewiride ashkarilishiche, ma méyxu'a 2017-yili 8-ayda qurban héyt munasiwiti bilen 54 ming somdek pul ajritip, xoten radiyo-téléwiziye uniwérsitétining 86 neper oqutquchi we ishchi-xizmetchisige talla bazirining yémek-ichmek sétiwélish kartisi tarqitip bergen iken.