Хитайниң қурбан һейтлиқ тәшвиқатлири тәнқидкә учриди

Мухбиримиз ирадә
2019-08-08
Елхәт
Пикир
Share
Принт

Уйғур аптоном районлуқ һөкүмәтниң авази болған «тәңритағ» тори қатарлиқ торбәтләрдә бүгүн қурбан һейтлиқ дәм елиш вә униңдики етибар бериш сиясәтлиригә аит хәвәрләрниң көпләп елан қилиниши диққәт қозғиди.

«Тәңритағ» ториниң хитайчә сәһиписи 8-авғуст күни бир қанчә парчә хәвәр тарқитип, қурбан һйетлиқ дәм елиш мәзгилидә пүтүн кичик типтики аптомобиллардин юқири сүрәтлик ташйол һәққиниң бикар қилинидиғанлиқи, һәр милләт хәлқиниң һейтни хушал-хурам күтүвелиши үчүн йол бихәтәрликигә капаләтлик қилинидиғанлиқини давраң салған.

«Тәңритағ» тори йәнә «қурбан һейтта нәгә берип ойнайсиз» мавзусида хәвәр елан қилип, ақсудики бир қисим саяһәт орунлирини тәшвиқ қилиш билән биргә кишиләрниң һаяҗан иликидә саяһәткә тәйярлиниватқанлиқини илгири сүргән.

Хитай һөкүмитиниң уйғур елидә аз дегәндә 2 милйон кишини лагерларға солиғанлиқи, уйғур, қазақ қатарлиқ мусулман хәлқләрниң миллий вә дини кимликигә қаттиқ зәрбә бериватқанлиқи нөвәттә хәлқара җәмийәтниң күчлүк тәнқидигә учраватқан бир пәйттә елан қилинған бу тәшвиқатлар көзәткүчиләрниң диққитини тартти.

Дуня уйғур қурултийиниң баянатчиси дилшат ришит хитай һөкүмитиниң юқириқидәк хәвәрләр билән сахта кәйпият бәрпа қилип, хәлқараниң көзини бойимақчи болуватқанлиқини билдүрди.

У бүгүн радийомизға қилған сөзидә һазир уйғур елидә һәрбир аилидә аз дегәндә бир яки икки киши лагерға қамалған, уйғурларниң әң аддий дини паалийәтлириму җинайәт қатарида бир тәрәп қилиниватқан вә мәсчит қатарлиқ орунлар қатму-қат көзитиш камералири билән көзитиливатқан бир шараитта һечқандақ бир уйғурниң хушал-хурам һейт өткүзәлмәйдиғанлиқи, һәтта хатирҗәм һалда һейт намизиға баралмайдиғанлиқини билдүрди.

У йәнә хитай һөкүмитини бундақ сахта һейт тәшвиқати қилишниң орниға лагерлардики милйонлиған кишиләрни әркинликкә чиқирип, уларниң қурбан һейтта аилиси билән җәм болушиға йол қоюши керәкликини тәкитлиди.

Пикирләр (0)
Share
Толуқ бәт