Xitayning qurban héytliq teshwiqatliri tenqidke uchridi

Muxbirimiz irade
2019-08-08
Élxet
Pikir
Share
Print

Uyghur aptonom rayonluq hökümetning awazi bolghan "Tengritagh" tori qatarliq torbetlerde bügün qurban héytliq dem élish we uningdiki étibar bérish siyasetlirige a'it xewerlerning köplep élan qilinishi diqqet qozghidi.

"Tengritagh" torining xitayche sehipisi 8-awghust küni bir qanche parche xewer tarqitip, qurban hyétliq dem élish mezgilide pütün kichik tiptiki aptomobillardin yuqiri sür'etlik tashyol heqqining bikar qilinidighanliqi, her millet xelqining héytni xushal-xuram kütüwélishi üchün yol bixeterlikige kapaletlik qilinidighanliqini dawrang salghan.

"Tengritagh" tori yene "Qurban héytta nege bérip oynaysiz" mawzusida xewer élan qilip, aqsudiki bir qisim sayahet orunlirini teshwiq qilish bilen birge kishilerning hayajan ilikide sayahetke teyyarliniwatqanliqini ilgiri sürgen.

Xitay hökümitining Uyghur élide az dégende 2 milyon kishini lagérlargha solighanliqi, Uyghur, qazaq qatarliq musulman xelqlerning milliy we dini kimlikige qattiq zerbe bériwatqanliqi nöwette xelq'ara jem'iyetning küchlük tenqidige uchrawatqan bir peytte élan qilin'ghan bu teshwiqatlar közetküchilerning diqqitini tartti.

Dunya Uyghur qurultiyining bayanatchisi dilshat rishit xitay hökümitining yuqiriqidek xewerler bilen saxta keypiyat berpa qilip, xelq'araning közini boyimaqchi boluwatqanliqini bildürdi.

U bügün radiyomizgha qilghan sözide hazir Uyghur élide herbir a'ilide az dégende bir yaki ikki kishi lagérgha qamalghan, Uyghurlarning eng addiy dini pa'aliyetlirimu jinayet qatarida bir terep qiliniwatqan we meschit qatarliq orunlar qatmu-qat közitish kaméraliri bilen közitiliwatqan bir shara'itta héchqandaq bir Uyghurning xushal-xuram héyt ötküzelmeydighanliqi, hetta xatirjem halda héyt namizigha baralmaydighanliqini bildürdi.

U yene xitay hökümitini bundaq saxta héyt teshwiqati qilishning ornigha lagérlardiki milyonlighan kishilerni erkinlikke chiqirip, ularning qurban héytta a'ilisi bilen jem bolushigha yol qoyushi kéreklikini tekitlidi.

Toluq bet