Тоқузтарадики җирғилаң йезисиниң имами норузни тәбриклигәнлики үчүн тутқун қилинип кесиветилгән

Мухбиримиз әркин
2019-09-18
Елхәт
Пикир
Share
Принт

Тоқузтара наһийәсидики җирғилаң йезисиниң имами ерҗан қумаш вә униң ярдәмчиси муратбек өмәр қатарлиқ 6 кишиниң өткән йил 3‏-айда қошниларни йиғип, норузни тәбриклигәнлики үчүн кесиветилгәнлики илгири сүрүлди.

Муратбек өмәрниң қазақистанда турушлуқ қейнакиси ярмуқамәт қудайбәргәнниң 17‏-сентәбир радийомиз хитай бөлүминиң мухбириға билдүрүшичә, муратбек өмәр өткән йил 21‏-март норуз күни йезиниң имами ерҗан қумаш қатарлиқ 5 киши билән бирла вақитта тутқун қилинип, бу йил 2‏-айда 18 йиллиқ кесиветилгән. Йеза имами ерҗан қувашқа 21 йиллиқ қамақ җазаси берилгән. Униң билдүрүшичә, сот мәһкимиси тутқунларни «қанунсиз йиғилиш өткүзүш», «қанунсиз радикал диний идийәләрни тарқитиш» билән әйиблигән.

Нөвәттә мурабек өмәр күнәс наһийәсидики йеңи селинған чоң типлиқ бир түрмидә тутуп турулмақтикән. Нурмуқамәт қудайбәргән қәйнинисиниң «дөләт етирап қилған диний зат» икәнлики, униңға наһийә дәриҗилик салаһийәт кинишкиси берилгәнликини билдүргән. Униң қәйт қилишичә, бу йил 35 яшлиқ муратбек өмәр җирғилаң йезисиниң алмалиқ кәнтидики мәсчит имами ерҗан қумашниң ярдәмчиси болуп ишлигәникән. У, имам ерҗан қумашниң өткән йили 21‏-март күни мәһәллидики қолум-қошниларни йиғип, бир өйдә норузни тәбриклигәнлики, бу җәрянда бир қанчә еғиз диний сөзләрни қилғанлиқи, бу уларни шу күни тутқун қилинип юқириқидәк еғир қамақ җазалириға һөкүм қилинишиға сәвәб болғанлиқини билдүргән.

Уйғур кишилик һоқуқ тәшкилатлириниң билдүрүшичә, «нөвәттә хитай һөкүмити райондики уйғур, қазақ вә башқа мусулманларниң һәрқандақ бир мәдәнийәт вә диний етиқад аламәтлирини радикаллиқ яки бөлгүнчиликниң ипадиси» дәп бастурмақтикән.

Пикирләр (0)
Share
Толуқ бәт